رانيا حفنى عشان تبقا مسلم صح لازم تقرا انجيل وتوراة كمان
انا مسلمة خريجة مدارس راهبات وتحديدا مدرسة "القديس يوسف الظهور لراهبات قلب يسوع المصريات "" واخويا خريج مدرسة "الفرير" ...وامي خريجة مدرسة "الراعي الصالح" وفي قلب مدرستي كان في ثمثال للسيدة العذراء وكنيسة واتربينا تربية مظبوطة كأننا ضباط جيش وفي يوم من الأيام كنت التانية علي الفصل ومع هذا الراهبة عاقبتني لأني في حصة الدين الأسلامي مكنتش حافظة سورة "الرحمن" وقعدت للساعة 5 الي ان حفظتها تماما..اللي عايزة اقولة لما نبقي في القرن ال 21 وبعد ثورتين ولسة بنقول "نهنيء ""الأخوة المسيحيين"" بمناسبة عيد الميلاد المجيد نبأة بنهرج لما لسة في البطاقة بيكتب مسيحي ومسلم نبقي بنهرج لما نتغافل عن اللي بيحصل في صعيد مصر نبقي بنهرج.لما دار الأفتاء تطلع فية بيان ويتم تناقلة في جميع وسائل الأعلام عن انة لا مانع من تهنئة الغير مسلمين بأعيادهم نبقي بنهرج وبعدين نطلع نقول يحيا الهلال مع الصليب حنهزر؟؟..هل حتقبل في بلدك اللي انت شايل جنسيتها بيان يقال فية "مسموح للمسيحيين تهنئة الأخوة المسلمين بعيدهم " ؟ هو الأمر محتاج ان حد يسمح او ميسمحش ؟ دي اخلاق وتربية عايز تحس بأحساسهم ؟ ...سافر اي دولة اوروبية متحضرة وشوف بيعاملوا المسلمين ازاي علي انهم متطرفين وارهابيين ....لما حتتوجع حتحس وتتربي وتفهم وموْخرا عشان تكمل لما وزير ثقافة مصر يقولك فيلم سيدنا موسي صهيوني ولن يتم عرضة زي المهزلة اللي حصلت مع فيلم سيدنا نوح.....في زمن مبأش فية الشباب بيفتحوا قرأن او انجيل نبقي بنستهبل عصفور قمر الدين دة مش فاهم ان الفن رسالة ؟ وان في شباب ميعرفوش اساسا قصص الأنبياء ؟مش فاهم انة من خلال فيلم ممكن يحبب ناس في القرأة اكثر؟؟ممكن يبقي في مغالطات عندك نقاد يا عم الحاج يقولوا دة.....خلاصة القول: عشان ينصلح الحال....انت مسلم ..مسيحي..سني ...شيعي ....بهائي...ملحد كل واحد حر ...احترم الأخر عشان الأخر يحترمك ....اللي ليك عندة ادبة وتعاملة معاك وشغلة وبس ....وخلاصة القول ان الممنوع مرغوب يا وزارة من يومك شمال ...والفيلم حيتشاف حيتشاف......ومن الأخر .....لسة بدري اوي.....لما ينضف الأزهر ويتفلتر نبقي نفتح الملف دة بالتفصيل ومن اخر الأخر ....مكتبتي فيها مصحف وتمثال للسيدة العذراء وانجيل كمان عملت عمرة اكثر من مرة ومحدش يقدر يحكم علي مدي تديني يا شعب اختزل الدين في حجاب ونقاب وسبحة ودقن ورنة تليفون ونسي مكارم الأخلاق... ...وفي بيتي شجرة الكريسماس ...وبشتري بابا نويل ....وبحتفل زي اي انسان متحضر بسنة جديدة ....ولو ربنا اراد يرزقني بولاد حعيد التجربة وادخلهم مدارس رهبان وراهبات ......عشان يطلعوا محترمين ومتحضرين ومثقفين ....في النهاية...عشان تبقي مسلم صح لازم تقرا انجيل وتوراة كمان عشان تبقي فاهم رسالة رب العالمين لكل الأنبياء ...افتخر بدينك وحبة وحارب من اجلة ...واحترم الأخر ودين الأخر وحبة واحترمة ...لأن في النهاية الرب واحد ...والوطن واحد. .......يا أمة اقرأ ..........حسبي الله ونعم الوكيل.
