رد عليا بكلمة واحدة...

[walaa farouk]

رفعت عيني وبكل خجل قولتله..😞
"بص يارب.. أنا جايلك لأنه مبقاش فاضلّي غيرك..
سمّيها علاقة مصلحة ماشي، مش باجيلك غير لما الدنيا تبوظ..😢
بس أنا فعلاً مليش غيرك دلوقتي..
اللي حواليا كلهم مش طايقيني..
ولا أنا عارف أريحهم، ولا هُما قادرين يفهموني..
مشاعري استُهلكت.. وعلاقتي بالناس كلها بقت خربانة.. 😑😞😢

واللي كنت بتعكز عليهم مشيوا..
واللي قالوا ان عمرهم ما هايزهقوا.. اديهم زهقوا!!
واختفوا فجأة..
وكأني عبء او تُقل محدش عايز يشيله.. 😞

طب أنت عارف؟ أنا حتي مبقتش أعرف أصلي.. بقيت بارد كدة مش عارف ايه اللي حصل!
ولا حتي بقيت قادر أبكي في مخدعي زي زمان..
دموعي نشفت.. بحاول أخرّج التعب اللي جوايا مش عارف.. 😢

طب أنت متخيل أنا في الكام شهر اللي فاتوا دول خسرت كام صديق؟ يُعتبر بقيت لوحدي..
مافضلش منهم ولا واحد حتي.. كلهم مشيوا !!
كلهم بتوع كلام وبس.. أو يمكن انا اللي بقيت شخص تقيل علي اللي حواليا..
بس عارف؟ عندهم حق.. أنا فعلاً بقيت مُتعب.. ليهم حق يرموني..😖😔

أنا أساساً مش عارف اذا كنت أنت لسا فاكرني أو بتحبني أنت كمان ولا ايه؟
ولا تكون زهقت مني زي الباقيين؟ ولا فقدت الأمل فيا أنت كمان؟
مش بعيد.. اذا كان أنا شخصياً فقدت الأمل في نفسي.. "
...

فضل مبتسم وهو بيسمعني..
وفضل مركّز أوي في ملامحي وأنا باحكي.. كأنه بيحاول يشبع منها علي قد ما يقدر..
واستني لحد ما طلعت كل اللي جوايا..
وبعدها رد عليا بكلمة واحدة بس..

"وحشتني" ❤

[marit jesus]

ربنا يبارك خدمتك الجميلة والمميزة

[Rena Jesus]

رووووووووووووووووووووووووووووووووعه
ربنا يفرح قلبك

[Mary Naeem]

مشاركة جميلة جدا

ربنا يبارك حياتك

[walaa farouk]

ماريت
رينا
مارى
ميرسي كتير على مروركم الغالى