فلاش ...وصورة ..وانتهى العرض

[walaa farouk]

كام زوجة معانا هنا في المحاضرة ..
سأل المحاضر ..
ف رفعت معظم الحاضرات ايديهن ..
ف ابتسم المحاضر ابتسامة هادئة .. ثم قال سؤاله الثاني بطريقة روتينية بحتة وهو يرتب اوراقه على المنصة ..
و كام واحدة سعيدة في جوازها ..

لم يرفع راسه حتى ليرى العدد كأنما هو يعلم ان وﻻ واحدة سترفع يدها !

رفع راسه وقال بصوت عال مفاحيء ..

ازاي تكوني زوجة سعيدة ؟
كلكم هنا عشان تعرفوا ازاي توصلوا لكدا ..
مظبوط ؟

همهمات تدل على الموافقة ..

طيب ..
مبدئيا ﻻزم نحفظ كلمة اساسية ها نبني عليها كل اللي جاي ..
احنا الزيت .. و انتوا المية ..
تمام ؟

ﻻحظ المحاضر عﻻمات البﻻهة على وجوه الحاضرات ف تنهد بفتور و قال موضحا ..
ان الست زي المية .. ليها كل خصائصها .. خفيفة .. سهلة الغليان .. سريعة التبخر .. تبرد بسرعة و هي عنصر اساسي في الحياة .. زيادتها تموت .. و قلتها تموت

الزيت .. ثقيل .. بياخد وقت اطول ومجهود اطول عشان يوصل للغليان .. ما بيتبخرش .. بياخد وقت اطول بكتير عشان يبرد .. حارق و ممكن يؤدي الى كوارث لو ما تعملناش معاه ب حرص ..

تمام كدا ؟

ف ابتسمت الحاضرات مع اصوات همهمات و تبادل نكات بين البعض ..
ف ابتسم هو كانما قطع شوطا كبيرا من محاضرته ف اكمل قائﻻ ..

هل ينفع نقارن الزيت بالمية ؟
عاوز اسمع اجابتكم بصوت عالي ..

ف ردت الحاضرات بصوت واحد قوي .. ﻷ ..

اتسعت ابتسامته وهو يقول ... طب احفظوا ردكم دا كويس ..

خليني تتكلم عن الزوج العادي الطبيعي تماما ..

الرجل يا هوانم بيقبل ب ادنى درجات الحب ..

هنا تعالت أصوات شهقات من الحاضرات و وقفت احداهن ل تقول ..

ادني ازاي يعني ؟؟؟ دا ان ماكانتش كل حاجة على سنجة عشرة يطلع عيني !!

ف رد هو قائﻻ .. بيتهيألك ...

عشان " انتي " بتحبي جوزك ف بتبقي عايزة تعملي كل حاجة على سنجة عشرة !
احسن اكل
كل يوم صنف و اتنين
مافيش اكل بايت .. هدومه مكوية اول ب اول .. عياله نضاف البيت ب يبرق الخ الخ الخ

الراجل مش عاوز كل دا على فكرة .. وﻻ حتى واخد باله من كل دة !!
يعني لو حضرتك ريحتي نفسك شويتين ها يبقى عادي عنده برضه

ارتفعت شهقات الحاضرات مرة اخرى ف اكمل مسرعا

الراجل ما يفرقش معاه كل محشي واﻻ فول النهاردة
سمك و بيكاتا و اﻻ بصارة و عدس !
المهم انه ياكل و يشبع .. بس !

مش مهم عنده انتي بتغسلي الهدوم اول ب اول و بتستعملي المسحوق الفﻻني اللي بيطلع البقع و المعطر العﻻني عشان الهدوم ريحينها تبقى مفحغحة واﻻ بتكوي يوميا او ﻻ.. المهم عنده انه يﻻقي هدمة مكوية يلبسها وهوة خارج و بس !

بدات الحاضرات ينظرن الى بعضهن البعض غير مصدقات ..
الراجل ليه الخطوط الاساسية اللي بيعيش بيها ..
الراجل ما يفهمش حاجة اسمها التفاصيل .. ما يعرفهاش .. وﻻ عمره هاياخد باله منها ..
و الدليل ..
انتي لو صبغتي شعرك مش هاياخد باله .. انما لو اقرعيتي احتمال ينتبه ..

هنا تعالت أصوات الضحكات من الحاضرات ..
ف ابتسم هو و اكمل ..

احنا مش زيكم .. احنا " الزيت " بيركز في مكانه و مالوش في التفاصيل الكتير
انا مش عاوز ادوش مخي
انا ب احب مخي فاضي .. لانه مدووش اصﻻ بالشغل و المصاريف و دول كفاية عليا جدا ..

لو عاوزة تكوني زوجة سعيدة .. مش مفروض تموتي نفسك عشاني !
انا كدا كدا عاوز منك الخطوط الرئيسية .. اديهالي و بس !
صعبة دي !

فقالت احد الحاضرات..
يعني الحق عليا اني ب اجي على نفسي عشان اعملك اكله حلوة كل يوم و اﻻ عشان ب انضف البيت يوميا واﻻ عشان عاوزا اعملك احسن حاجة ؟

هنا رد المحاضر ببرود ..
ومين قالك تعملي كدا ؟

كان الرد صادما لدرجة ان القاعة كلها صمتت صمتا تاما ..
بينما اتسعت حدقتا السائلة و عندما همت بالجلوس كرر هو السؤال ..

حضرتك ماردتيش عليا ؟ مين قالك تعملي كدا ؟؟
جوزك طلب منك دا ؟؟

تلعثمت قليﻻ ثم قالت ..
ﻷ !
بس هو دة جزاتي عشان ب اجي على نفسي عشانه ؟
عشان ب اضحي عشانه ؟

رد هو بنفس البرود ..
حضرتك ضحيتي ب اختيارك .. ب تحاسبي زوجك ليه ؟؟!
انا فان جوخ قطع ودنه عشان يهادي بيها حبيبته .. حبيبته ليها ذنب ؟؟

صمت في القاعة ..
ف ردد بصوت صارم
ليها ذنب ؟

ف ردت الحاضرات بصوت خافت ..ﻻ ..

ابتسم هو بينما قال .. بالمناسبة معلومة انه قطع ودنه عشان حبيبته دي غلط ..

نرجع ل كﻻمنا ..
الرجل ما يفهمش معنى التضحية في الحاجات دي
واحدة عملت محشي النهاردة .. برافوا
عملت فول بكرة .. و ماله ..
عملت تونة بعده .. مش ها اموت وﻻ ها اقتلك يعني !!!

انتوا اللي بتحبوا تاخدوا دور الام كامل .. مع انك مجرد زوجة .. و اما " تعوديه " على كدا و يبتدي يحاسبك على " تقصيرك " في اللي انتي خلقتيه .. تزعلي !!

طب ماكان من الاول ..
اهم قاعدة في الزواج السعيد .. اعملي اللي في مقدرتك مش اللي اكتر من مقدرتك ..
عشان انا ك زوج .. ها اعمل اللي في مقدرتي و بس ..

هنا وقفت سيدة اخرى و قالت ..

بس مش كل الرجالة كدا !
لو على مثال الاكل .. في رجاله لو مش كل يوم صنف محترم تقلب البيت حريقة

هنا ابتسم المحاضر و صفق بيديه قائﻻ ..
امسك تخصص ...
بمعنى ..
الزوج دا عنده شيء محدد بيحبه بطريقة معينة .. خﻻص .. يبقى اعمله دا بطريقته ..
يعني.. الزوج عاشق الاكل .. انبساطه في الاكل
الزوج عاشق الدلع .. انبساطه في الدلع مع مراته
الزوج عاشق المراة الجميلة
انبساطه في جمال زوجته

ايه المشكلة !

انما تعالي بقا ادي الزوج عاشق الاكل زوجة قمر بس فاشلة في الطبخ .. وﻻ اكنه متجوز و ها تبقى ايام سودة
لانه مش اهتمامه اصﻻ هيه جميلة او ﻻ ..

يبقى قاعدة رقم اتنين ..
اوفر مجهودي للحاجة اللي ها تعمل فرق عند زوجي .. عشان ما اهدرش طاقتي و اضيع وقتي ع الفاضي ..

سكت برهة ثم قال لاحداهن ..
لو سمحتي ..
ممكن تناوليني الكوباية اللي ع المكتب دي ؟
و اشار الى كوب يبعد عنه مسافة ذراع فقط ..

فقامت السيدة و تحركت من كرسيها مسافة 3 امتار و ناولته الكوب ثم عادت ل تجلس ..

ف ابتسم هو و قال ..
و الله انتي ست جميلة ..

ثم اتبع
حضرتك اديتيني الكوباية ليه ؟
ف ذهلت الحاضرات بينما ردت السيدة ب حيرة
مش انت قلتلي اديهالك ؟؟؟

فقال هو ..
يعني انتي قمتي من مكانك و مشيتي 3 متر و ناولتيني الكوباية و بعدين رجعتي ال 3 متر و قعدتي في حين كان ممكن انا " اميل " بس في اقل من ثانية و اخدها !

القاعدة رقم تﻻتة للزوجة السعيدة ..
ما تشيليش شيلة مش شيلتك .. عشان اللي يﻻقي دلع و ما يدلعش يبقى غبي ..

الزوج طول الوقت قبل ما يبقى زوج بيتعامل ك ابن
ماما غالبا بتعمل كل حاجة.. ف لما ب اتجوز ب استكشف تدريجيا ايه الكائن اللي اتجوزته دا
لو حطيتي نفسك في خانة الام .. ها اعاملك زي ما ب اعاملها فورا .. من عقلي الباطن حتى و بدون ما احس ..
و ساعتها انتي اكتر واحدة ها تندمي ..

فاهمين قصدي ؟

ف ابتسمت الحاضرات مع همهمات تفرقت بين التحسر و الايجاب ..

طب انا شايف ناخد بريك و نرجع نكمل بعد شوية ..

*
فﻻش .. و .. صورة .. و .. إنتهى ..العرض

[Mary Naeem]

ربنا يبارك حياتك

[walaa farouk]

ميرسي على مرورك الغالى مارى

[Rena Jesus]

هى وجهه نظر بردو

ميرسى على موضوعك ربنا يفرح قلبك

[walaa farouk]

ميرسي على مرورك الغالى رينا