السنة دي انا مش عايزة ازين شجرة عيد الميلاد .. انا نفسي يارب انك تزرع شجرة عيد الميلاد جوا قلبي .. علشان تفضل الشجرة دي موجودة طول السنة .. مش بس مجرد كام يوم لحد العيد ما يخلص وخلاص .. تفضل عايشة جوايا خضرة ومتزينة ليك .. خضرة طول السنة لأن هي دي الحياة اللي وهبتها ليا بموتك ع الصليب ولأني مغروسة فيك و في كرمك .. مليانة أنوار و بتلمع نتيجة لنورك اللي بينور جوا قلبي يا شمس البر .. فوقيها نجمة كبيرة جميلة دايما بترشدني لمكانك ولبيتك و بتخليني انا كمان اقدر ارشد غيري لو تاه في طريقه .. متزينة بفيونكات حمرة علشان تفكرني بيوم معموديتي وبالزنار الأحمر اللي كان ملفوف حواليا .. مليانة ب كور جميلة وملونة .. كل كورة بفضيلة بتعملها منك كل ما أكون معاك و اسمع كلامك .. نفسي الشجرة دي تتزرع جوايا وتفضل دايما تكبر وتكون علي طول متزينة و منورة و جميلة طول السنة .. لأن قلبي لازم يبقي دايما متزين وجميل طول السنة مش بس في مواسم معينة ...
بقلم ماريان عادل
