إنت مسيحي يابني؟!

[ماريا تى ثيؤتوكوس]

دينا نجم" تكتب : إنت مسيحي يابني؟!




من القصص اللي أثرت فيا جدا و عمري ما أنساها، قصة صديق من أقرب أصدقائي وواحد من أمهر الناس اللي شوفتهم بيلعبوا كورة.. حلم حياته كان إنه يبقى لاعب كورة محترف

وكخطوة أولى على طريق الحلم ده، التحق باختبارات نادي شهير ومن أندية المقدمة في الوقت ده.. عدد اللي قدموا وقتها كان ١٥٠٠ واحد وصلوا بعد التصفيات لـ ٦٠.. صديقي كان مقدم معاه في الاختبارات ابن خاله واسمه مينا.. والاتنين نجحوا إنهم يوصلوا للتصفية النهائية.

وقت إعلان النتيجة، كانوا بينادوا على شخص شخص و يقولوا له القرار.. حيكمل معاهم ولا لأ.. فلما جاء دور صديقي في النداء، سأله المدرب: إنت مسيحي يابني؟ فجاء رده التلقائي على السؤال اللي في مش في وقته ولا مكانه: أيوه مسيحي.. فكانت النتيجة قرار الاستبعاد الفوري.. أما مينا فلم يتم النداء عليه أبدًا حتى يومنا هذا ودة طبعًا لإن إسم "مينا" لا يحتمل الشك وبالتالي لا يحتاج إلي السؤال فكان الاستبعاد الصامت!

قبل ما تسد ودانك وتدور وشك و تدفن دماغك في الرمل وتحاول تقنع نفسك إن ده مش ممكن يكون حقيقي عشان تريح بالك، اسأل نفسك كده هو إزاي عمرنا ما سمعنا عن لاعب كورة مسيحي غير هاني رمزي؟! على الأقل اللي جيلي يوعى عليه يعني وشافه بيلعب؟ هل مثلاً على مدار العشرين سنة اللي فاتوا مكانش فيه أي مواطن مسيحي موهوب في لعب الكرة حاول يحترفها؟ شايف إن ده منطقي وطبيعي؟! وفي قصص تانية تخض أكتر من القصة دي بكتير على فكرة؛ زي إن يوم ما حد يحاول يخدم بقى فبيطلب من اللاعب اللي عايز يحصل على الفرصة إنه يغير اسمه عشان يحافظ على حظوظه! و مش بعيد يكون اللي ساعد هاني رمزي إن إسمه مكانش يوحنا بولس!

طبعًا.. في ناس كتير رغم تصديقها إن ده حصل و بيحصل، حتحاول تقلل من حجم المشكلة بحجة إيه يعني الكورة وإيه أهميتها ودي في الآخر لعبة و حاجات من النوع ده، بس القصة هنا مش في الكورة خالص.. القصة إن دة كان حلم بني آدم قايم نايم يفكر فيه وجة واحد قرر يمحي كل آماله بجرة قلم عقابا ليه على إنه ينتمي لدين مش على مزاجه!

ده غير إن الموضوع ده مش مقتصر على الكورة و بس.. الموضوع موجود في كتير من المؤسسات والجهات اللي بتلاقي فيها إنه من الصعب إن المدير ولا رئيسة القسم مثلا تكون مسيحية! ده حتى الفن اللي المفروض إنه مليان عقليات متفتحة فبرضه الفنانين المسيحيين بيعتبروا حالة نادرة و يتعدوا على الصوابع!

أنا مش جاية أنادي بالوحدة الوطنية والهلال مع الصليب لإني عمري ما اقتنعت إن الشعارات والرسومات والأغاني ممكن تحل مشاكل جذورها راجعة لسنين طويلة! ومش جاية أتكلم عن اضطهاد ديني لأني مقتنعة إن المسألة مش مرتبطة بسياسات دولة ولا أوامر مسؤولين.

أشك إن فيه أي مسئول بيدي أوامر باستبعاد المسيحيين أو حرمانهم من الحصول على الفرصة! الموضوع مرتبط بينا إحنا كمواطنين بنسكت عن الظلم طول ماهو مش طايلنا! أنا نفسي ورغم إني كتير فكرت وتساءلت هم المسيحيين راحوا فين في مجالات كتير، بس الموضوع موجعنيش و محركنيش غير لما خبط في حد قريب مني وعزيز عليا وتخيلت إحساسه و حلم حياته بيتبخر قدام عينيه عشان هو من القليلين! لإن المسألة مش مسألة دين و بس... المسألة في إنك تبقى منتمي للأقلية اللي سهل تتظلم عشان مفيش منها كتير يدافع عن حقها!

والغريب إننا كشعب بنحترم ونمدح في الأجانب لما نشوفهم منحازين لقضية مش مرتبطة بيهم شخصيا وبيتعاطفوا مع فئات مظلومة في أنحاء أخرى من العالم لا يمتوا ليهم بصلة.. بس إحنا مبنعملش ده.. عشان الفرق بينا و بينهم إنهم بيقفوا ضد فكرة الظلم بصرف النظر مين هو المظلوم، إنما إحنا بنشوف مين المظلوم الأول، بنحبه ولا مبنحبوش، فارق معانا ولا لأ و بعدين نقرر حنتعاطف معاه ولا حنعمل نفسنا مشوفناش حاجة!

أنا باتمنى و بطلب من كل مسؤول في أي مؤسسة سواء نادي ولا مدرسة ولا شركة ولا مصلحة حكومية، إن لو في إمكانه إنه يمنع ده أو على الأقل يقلل إمكانية حدوثه بفرض بعض الرقابة، إنه يعمل كده...أما اللي مش في موقع مسؤولية، و لسه مش عارف إن ده بيحصل لازم يعرف، واللي عارف وناسي أو متناسي لازم يفتكر و يفكر.. عشان النهارده هو مع الأغلبية و محمي بيها بس بكره ممكن يلاقي نفسه من غير ضهر يسنده لو الدنيا حدفته للكفة الأخف من الميزان..

لو كام واحد من اللي شافوا المدرب بيستبعد اللاعب عشان مسيحي اعترضوا و مسكتوش و خدوا موقف مش بعيد كانوا غيروا الواقع! اتخاذ الموقف والوقوف في وش الظلم واعتراض طريقه مش أكيد حيجيب نتيجة بس اللي أكيد إن السكوت عن الظلم مش حيجي من وراه غير تفشي الظلم و إنتشاره!

[Mary Naeem]

مشاركة جميلة جدا

ربنا يبارك حياتك

[nasser]

موضوع خالد وفى منتهى الأهمية يا ماريا
شوفى يا ماريا أنا قعدت سنين طويلة انظم دورات رياضية فى جميع كنائس القاهرة من ابتدائى حتى الجامعات يعنى من الناشئين حتى الشباب مش عارف اقولك ايه عدى عليا مهارات أحسن من بيليه وماردونا عالمياً وأحسن من الخطيب وحسن شحاتة محلياً ومش عايز أكون مغرور نسيت اقولك أنا كمان كانت مهاراتى كانت عالية فى كرة القدم وبعد كده كنت بادرب الشباب فى الكنائس وانظم الدورات
واعرف واحد معانا كان أكبر منى وصلت انهم كتبوا اسمه فى الجرائد والمجلات كان بيلعب فى نادى السكة الحديد ومعروف السكة الحديد أقدم نادى فى مصر أقدم من الأهلى والزمالك وكان شكله يشبه الخطيب تماماً ومهاراته أيضاَ زى الخطيب وكان بيلعب فى السبعينات تحت 21 سنة فى وقت ما كان الخطيب بيلعب ولفت الأنظار ونزل عنوان كبير فى احدى المجلات
(بيبو جديد فى السكة الحديد) وبعد كده اختفى وطيروه وأنا شفت لعبه وكنا بنلعب معاه وهو كان أكبر مننا وكان بكالوريوس هندسة وبعد كده هاجر أمريكا غير ناس كانوا فى نادى الطيران وأندية أخرى
أما بالنسبة لهانى رمزى ده بقى فلت بمعجزة ليه؟
لأنه وقتها ساعة اختيار الناشئين فى الأهلى اللى كان بيختارهم مدرب أجنبى كبير كان جايبه صالح سليم وانت عارفة صالح سليم معندهوش حاجة اسمها واسطة لدرجة انه بطل ابنه كورة علشان معندهوش مهارات
وبعد كأس العالم 1990 وقفوا ضد هانى رمزى علشان كان عايز يحترف فى ألمانيا والوحيد الى وقف جنبه وخللاه يحترف هو اللاعب الأسطورى صاحب الأخلاق العالية الخطيب
يعنى باختصار ايوه فى تعصب ضد المسيحيين فى أوقات اختيار الناشئين ولو كان يتم اختيار المسيحين لكان حالنا أحسن وينوصل كأس العالم وكمان شباب الكنائس هو وفى الأشبال مش بيذهب لأنه عارف النتيجة مقدماً وزى ما قولتلك فى البداية شفت بنفسى على مر الأجيال مشروع عظماء فى كرة القدم تم دفنهم للأسف
ميرسى كتير يا ماريا على فتح هذا الموضوع المهم
ربنا يبارك حياتك

[ماريا تى ثيؤتوكوس]

ميرسى كتير مارى لمرورك الغالى


ناصر اولا كويس انهم متعصبين علشان شكلك كده كنت هتبقى مهم
وكنا مش هنقدر نكلمك ولا نتعرف على شخصك المبارك

للأسف يا ناصر التفريق والعنصريه دلوقتى مش فى الكوره بس
دول فى كل المجالات والشركات الكبيره وحتى البنوك
ودى مشكلة الوطن العربى كله بيدورا مش على الكفاءه او على المهاره
لا على الدين او على االطبقه
علشان كده عمرنا ما هنتقدم وخلى اولادنا يدورا
بقى على مكان تانى ينجحوا فيه
زى الدكتوزر مجدى يعقوب والمهندس هانى عازر
ميرسى كتير للمشاركه اللى اثرت الموضوع ناصر

[حنان بنت المسيح]

ميرسي حبيبتى على موضوعك المميز
ربنا يبارك خدمتك

[ماريا تى ثيؤتوكوس]

ميرسى حنان
لمرورك الجميل حبيبتى