تداريب أسبوع الألام

[tito227]

تداريب أسبوع الألام

الاثنين 14 ابريل 2014
القمص داود لمعي راعي كنيسة مارمرقس كليوباترا

1- اقفلوا التليفزيونات خالص من أحد السعف لأحد القيامة.. نقفل الفيس بوك خالص فى أسبوع الآلام وحاول تقلل من الموبايل.. لو سى تى فى أو مارمرقس أو أغابى ماشى، غير كده لأ...
افصل نفسك خالص عن العالم والدوشة والأخبار، فكل الحاجات اللى هى مضيعة للوقت قول فيها: "يارب يسوع أشكرك" الدقيقة اللى هتقول فيها كدة ستكون أحلى كتير من الكلام الفاضى.



2- غنى الأسبوع ده كله فى كلمة ربنا يعنى خلى الأنجيل معاك دايماً وحاول تخلص أكبر جزء منه على قد ما تقدر، يعنى حاول تقرأ سفر فى اليوم - هياخد منك ساعتين مش وقت كبير يعنى .. احضروا بصخات على اد ما تقدروا، الوجود فى الكنيسة لوحده تدريب.. إنك تبقى لاصق فى المسيح الأسبوع ده بالذات زى امنا العذراء ويوحنا الحبيب.


3- متتكلموش بقدر الإمكان فى البصخات.. بالذات أنا بنزعج أن الناس بعد البصخة واقفة تحكى الحكاوى دى كلها وبتضيع الشحنة الروحية اللى إحنا أخذناها من البصخة.. فالأفضل أنك تصلى وتمشى ربنا بيبقى مستنينا نركز معاه فخلينا بقى ناخدها جد.. خليك حريص اد ما تقدر انك متغلطش بلسانك، وحاولوا تشتروا لبس العيد قبل اسبوع الآلام.


4- يفضل كل اللى بيعمل مطانيات اللى مكنش بيعمل مطانيات دى فرصتنا فى السجود ده أسبوع السجود فى السنة كلها.. المطانيات بأى عدد بس تصلى من قلبك.. ومش لازم تكون قدام الناس لكن من الأفضل أنه يعمل المطانيه فى بيته أو الغرفة بتاعته لأنها فى الخفاء أفضل لأن الغرض مش حركة بل الغرض روحانية.. انصحكم فى كل يوم من ايام البصخة تصلوا من 10 – 20 مزمور كل يوم.. لو قدرتم تصلوا 20 مزمور فى اليوم هتخلصوا المزامير كلها.. اعمل بصخة فى البيت مع نفسك.. اقرأ النبوات وصلى ثوك تى تى جوم والمزمور والإنجيل والطلبة.. صلى فى مخدعك فى الخفاء، ده بجانب حضور الكنيسة طبعاً.


5- زيارة المرضى والفقراء بما لا يخلُ من روح الصلاة.. يفضل السؤال بالزيارة مش سؤال بالتليفون - لو تقدر- لأن سؤال المحبة فى الأسبوع ده مهم ولازم الافتقاد للناس اليتامى ده ضرورى جداً ونبصله بناحية دول المصلوبين حالياً لأن الناس دى ظروفها صعبة ومجروحة.. مش تروحوا تحكوا بل انقلوا الكنيسة لبيوت المرضى والمسنين.


6- قلل نشاطك الاجتماعى والوظيفى كمان.. مش وقت مجاملات، ولا زيارات، ومش وقت شغل ان أمكن


7- حاول تقول لحن "لك القوة والمجد" فى كل وقت على أد ما تقدر.. لا تكف عن كلمة: "يارب يسوع المسيح ارحمنى أنا الخاطى" .. اطلب الرحمة ليك وللناس كلها.


8- امنع الرفاهيات خالص الأسبوع ده..لا يليق أن أحنا ندلع نفسنا الأسبوع ده بيبقى فى ذهد ونسك.. يعنى الأسبوع ده لازم يبقى جد شوية، وبرده الأكل بحساب - مش معنى أن أكل صيامى أكل براحتى - لا أحنا غرضنا نقف على رجلينا مش غرضنا نشبع شهوات أجسادنا.. يعنى تاكل ما يسد الرمق بس وبلاش تحبيش الاكل والطرشى ، كل خفيف.. عايزين ننشغل بالصلاة بس.


10- الصوم الانقطاعى مهم حتى لو صدعت شوية.. اللى يقدر يقدر ومن غير ما ندين حد.. ارفع درجة الصوم شوية الأسبوع ده.


11- لو عندك صورة أو صليب خشب، اقعد تحتيه 1/2 ساعة فى اليوم.. واتخيل مشاعر العدرا ويوحنا والمجدلية.. بص على المسامير وعلى جنب يسوع وعلى اكليل الشوك وعلى الجلدات.. ركز فى الصليب..


12- فى وقت القراءات القبطى فى البصخة، خلى معاك كتاب تعد تقرا فيه زى كتب البابا شنودة مثلاً كتاب لك القوة والمجد.. وكتب تانية كتير.. وبالمناسبة الألحان الطويلة دى فرصة جميلة ان كلمات المزمور نتأمل فيها، لو قدرت تركز فيها حلو.. ولو مقدرتش كتابك معاك.. وأنت بتابع ياريت كل ساعة تلقط جزء من مزمور الساعة وتكرره كتير حاول تعيد الألحان كتير وتكررها كذا مرة من قلبك.. تكرار حلو مش تكرار باطل وخلاص.. تكرار حلو زى المسيح ما كان بيكرر ليلة جسمانى "إن أمكن أن تعبر عنى هذا الكأس" كان تكرار حلو لأنه طالع من قلبه.. البنات والسيدات أرجوكم ألبسوا كويس الأسبوع ده ولحد ليلة العيد أعملوا معروف وبعد العيد طبعاً بس يعنى متحزنوش قلب الكنيسة فى ليلة العيد بلبس لا يليق.


13- وزع شوية من بيتك على اد ما تقدر.. الحاجات المركونة.. احنا اتفقنا ان السنة دى هتكون سنة العطاء.. كل يوم وزع حاجة على حد.. العطاء هو تعبير حب للمصلوب.. قل له: انت ادتنى عمرك يا رب.. مهما اديت هاديك ايه؟ ولا تنسوا الغلابة الغير المؤمنين فى العطاء.


14- من التداريب المناسبة فى أسبوع الآلام أن الواحد يعترف.. إذا معترفش من قريب لأن جلسة الإعتراف بتحطك على الطريق "اللى فات شيئ واللى جاى شيئ تانى خالص" عاوز أخدها جد فحاولوا الأسبوع ده اللى معترفش يبحث على أب أعترافه ويعترف.. اى حد زعلان منك أو انت زعلان منه تصالحه.. اقلها تليفون أو زيارة.. ده المسيح جه مشوار من السما للأرض عشان يصالحنا مع أن إحنا اللى مزعلينه.. برده حتى لو هم اللى مزعلينك، قلد المسيح وروح صالح الناس وفرحهم..


15- فى شباب بيناموا على الأرض كنوع من النسك أو إذلال النفس، وكنوع من المشاركة مع المتألمين.. دى بركة


16- ركز على آية من النبوات مثلاً وخليها مادة للتأمل أثناء قراءة المزمور قبطى باللحن.. واتكلم مع ربنا فى الآية دى وممكن كمان تكتب تأملاتك تبقى "تأملات أسبوع الألام 2014"


17- من الحاجات الحلوة برده أنك تفتقد نفس كبيرة وتجيبها معاك البصخة لأنك ممكن تفرح ربنا قدام صليبه أنك جايبله شخصية بعيدة عنه وغايبة عنه بقالها كتير.. دى أجمل هدية تجيبها لربنا.. المسنين اللى ميقدروش ييجوا الكنيسة لوحدهم، ليه متعديش عليه وتروح توصله.. تبقى فرحت بربنا وفرحت قلب واحد ظروفه مش سمحة له بكده.


18- أحزروا خطايا أسبوع الآلام منها:
الشراهة – أى كثرة الأكل.. فتلاقى نفسك عاوز تأكل كتير فلازم تبقى واعى كويس قوى..
كمان شيطان الغضب - تلاقى مواقف تستفزك.. خلى بالك..
أو شيطان الإدانة - نجيب سيرة حد ونعد نتكلم على بعض.. كل دى خطايا يعنى أسوأ ما يمكن أنها تحصل فى أسبوع زى كده له كرامته وهيبته.. وكلنا مركزين فى الصلاة والتوبة.


19- قدموا بعضكم على بعض - الناس تيجى الكنيسة تبقى هتتخانق على الكراسى.. ولما يعد على كرسى يبقى وكأنه فرحان ان اخوه مش لاقى كرسى.. اسبوع آلام ايه كده؟!! قوم وريح اللى حواليك.. واوعى تذق فى التناول.. ان شاء الله تبقى اخر واحد..


20- النوم يبقى بحساب.. المسيح فى ليلة واحدة من اسبوع الآلام قال 3مرات "اسهروا".. يعنى لو طول السنة مقصر.. فى الاسبوع ده نشد على نفسنا شوية.. خد كفايتك بس مش بزيادة..


21- متضيعوش الجرعة الروحية اللى اخدتوها طول الصوم فى يوم العيد.. تصلى باكر بذمة وتقرا انجيل القيامة من الاناجيل الـ4 قبل ما تنزل تعيد على قرايبك وزمايلك.. لكن ميبقاش العيد يوم جسدى نختمه بالأكل وخلاص. يوم العيد ده يوم المسيح برده.. لازم نعد معاه ونتمتع بيه ونعيد معاه..


وكل سنة وانتم طيبين

[emy gogo]

ميرسى يا تيتو على الموضوع الرااااااااااااااااائع ده
ربنا يبارك خدمتك