حمدى رزق يكتب: إنت وقعت ولا الهوا اللى رماك يا مرسى

[Mary Naeem]

حمدى رزق يكتب: إنت وقعت ولا الهوا اللى رماك يا مرسى




محاكمة مرسى فى أكاديمية الشرطة أمس كان ينقصها بعض من الفكاهة، كوميديا الموقف، فقط الحضور الطاغى للفنان الراحل الكبير رياض القصبجى، الشهير بالشاويش عطية، يمسك بالمعزول وهو نازل من الطائرة من كتفه مشبها عليه، شفته فين قبل كده، آه فى القصر الجمهورى..
■ الشاويش عطية: إنت وقعت ولا الهوا اللى رماك يا مرسى.
- المعزول: والله يا بنى ما أنا شايف.
■ الشاويش عطية: ابنك، عاشت الأسامى، تسلم الأيادى، مرحب مرحب، حصلت البركة.
- المعزول: الله يبارك فيك، بس بلاش تسلم الأيادى، لأن جسمى بيتلبش.
■ الشاويش عطية: الله يسلمك، وحشتنى موت.. موت.. موت..
_ المعزول: إن شاء الله متشوفش وحش.
■ الشاويش عطية: ما أنا شايفه أهه. ينظر فى عين المعزول، يغيظه الحول الظاهر، يفرك وجه العياط بكف يده اليمنى بغيظ، يلخبط وشه تلخبيط، يمسكه من صداغه، يفرك خدوده، تشكه ذقنه، تشبه ذقن القنفذ.. متسائلا: إنت عارف يا مرسى إنت جاى الأكاديمية هنا ليه؟
- المعزول: أبدا يا شاويش عطية، أنا كنت رئيس وبعدين عزلونى، وخطفونى، وأكلونى بط محشى بالحمام، والحمام محشى بالفريك.
■ الشاويش: والاتهامات الموجودة فى ملفك، بتنكرها ولا بتستعبط، أنت عارف عقوبتها كام يا حلو، عارف عقوبتها كام يا خفيف، 25 سنة يا جميل، ربع قرن يا رفضى.
- المعزول: القضية دى قضية شرعية ليست جنائية، لازم نعرضها على محكمة دولية، لازم ندول القضية، ونعرضها على العالم حالا.
■ الشاويش: العالم فاضى علشانك يا هلفوت، فاكر نفسك رئيس يا رفضى، إلبس البدلة البيضاء.
- المعزول: أنا حلو كده، أنا لابس الجاكتة.
■ الشاويش: جاكتة يا أبوجلابية، إسمع الكلام يا رفضى، إلبس يا هلفوت بدلة السجن زى بقية الهلافيت.

- المعزول: يا شاويش خايف أقلعها لاحسن أبرد.
■ الشاويش: هتقلعها غصب عن حبابى عنيك، لابس جاكتة ليه رايح الرئاسة ولا عندك تفتيش، وكمان رافض تقلعها، إنت سنتك سودة، إنت فاكر نفسك رئيس، إنت داخل القفص يا مسجون، إن ما مشيتك على العجين ما تلخبطوش، قيام يا متهم، انتباه يا مجرم، اقلع يا لومنجى، اسمع الكلام وأطع الأوامر يا رد السجون، زى ما هربت من سجن وادى النطرون لازم ترجع السجن، ترجع بطن الزير، فاكرها سايبة، ولا فوضى، هنا السجن تهذيب وتأديب وإصلاح.
- المعزول: يا شاويش عطية ارحموا عزيز قوم ذل.
■ الشاويش: هع. هع. هع. هععععععع، عزيز هع، ذل هع، إنت لسه شفت حاجة، إن ماوريتك النجوم فى عز الضهر.
- المعزول: أنا رئيس سابق وأستاذ سابق ورئيس حزب سابق…
■ الشاويش: يعنى سوابق.
- المعزول: أنا كنت شغال فى ناسا بس نسيت..
■ الشاويش: يا مثبت العقل، إنت يا رفضى شكل ناسا، إنت جر شكل، مجرم، رئيس عصابة، لومنجى.
- المعزول: وكنت رئيسك…
■ الشاويش: قطع لسانك، آخرة صبرى رئيس سوابق، رئيس عصابة. وينظر فى القفص، أعقل واحد فيهم مجنون، وأجن واحد فيهم مرشد، وأعبط واحد فيهم رئيس، أنا فى عرض العباسية.
- المعزول: شفتنى وأنا بهتف فى المحكمة…
■ الشاويش: آه يا ابن الرفضى، شرعى على مين، 30 مليون خرجوا يزفوك، انتباه يا مجرم، جاوب على السؤال: شغلتك فى القصر الرئاسى كانت إيه؟
- المعزول: بورورووووووم.
- شغلتك فى القصر بورورووووووم.. طيب إنجر إمشى قدامى يا رفضى يا ابن الرفضى على سجن برج العرب.
(منقول بتصرف من فيلمى «ابن حميدو»، و«إسماعيل ياسين فى الأسطول»، ويلعب المعزول دور إسماعيل ياسين مع الفارق لصالح إسماعيل طبعا).