تعتمد فكرة الاسكتش على مشاركة المشاهدين فى معرفة شخصيات الاسكتش
تصلح لمرحلة اعدادى او مراحل متقدمة من ابتدائى
الشخصيات
1/ مينا
2/ سمعان القيروان
3/ بطرس الرسول
4/ توما الرسول
5/ يوحنا الرسول
6/ الملاك ميخائيل
{{ ياتى صوت دون أن يظهر احد }}
مينا صباح الخير يا اصدقائى كل سنة وانتو طيبين النهارده عيد القيامة وكلنا فرحانيين ومبسوطين لكن انا
اكتر واحد فرحان ،، اكتر من اى واحد فيكم لان انبارح يوم سبت النور حصل معايا حاجه مش ممكن هاتسدقوها .................
اصل انا مكنتش عاوز اروح القداس وبعدين وانا واقف بالف حوالين صور الكنيسه قابلت
ناس .................... اقولكم حاجه تعالوا شوفوا ايه اللى حصل معايا وانتو هاتعرفوا انا ليه فرحان وسعيد للدرجه دى
{{ يظهر مينا على المسرح وهو يكلم نفسه}}
مينا برضه مش هاروح الكنيسه كل سنه باروح وبارجع وانا مش فاهم حاجه وبعدين ايه لازمة القيامة وايه حكاية تمثلية القيامه اللى بتتعمل كل سنه هو احنا رايحين نمثل ولا رايحين نصلى انا خلاص مش هاحضر القداس بتاع العيد تانى وهاعمل زى الناس اللى بتقف طول القداس فى حوش الكنيسه ايه المشكله
{{ يظهر شخص مستعجل ويحاول المرور من وار مينا ويرتدى ملابس غريبه}}
سمعان عن اذنك لو سمحت عاوز اعدى بسرعه
مينا انت مستعجل على ايه هيه الدنيا طارت
سمعان معلش عاوز الحق القداس من اوله علشان ماتفتنيش حاجه من الصلاه
مينا انت هاتدخل الكنيسه
سمعان طبعا النهارده سبت النور وقداس العيد هايبتدى ......... هو انت مش هاتدخل الكنيسه
مينا لاء مش هادخل وبعدين انت شكلك غريب وهدومك غريبه انت مين وجاى منين
سمعان انا من بلد اسمها القيروان وانا كنت من الناس اللى شافوا الام السيد المسيح
مينا شفت الام السيد المسيح معقول
سمعان مش بس شفتها انا كمان كتفى كان فى كتفه وكنت سامع صوت اهات الالم وهيه طالعة من قلبه الحنون وهو صامت مش بيحاول حتى يدافع عن نفسه
مينا حضرتك اكيد واحد من التلاميذ
سمعان يا ريت كنت واحد من التلاميذ
مينا امال ايه اللى خلاك تشوف الآلام وتكون جنبه
سمعان انا سمعت عنة ورحت اورشليم علشان اشوف مين هو المسيح اللى بيتكلموا عليه واللى بيعمل كل المعجزات العظيمه دى ............... .{ فى حزن } لكن لما رحت لقيت اليهود طلبوا انهم يصلبوه وكان شايل الصليب وماشى فى طريق الجلجثه
مينا وازاى كنت سامع نبض قلبه زى مابتقول
سمعان وانا واقف وسط الجموع لاقيت واحد من الجنود الرومان شدنى وحط الصليب على كتفى وخلانى أشيله وكان حمله تقيل قوى وعند الجاجثه سمروه على الصليب ومات علشان يفدينى وساعتها عرفت قد ايه هو حبنى واتحمل كتير علشانى
مينا ياه يا ربى يسوع كل العذاب ده استحملته علشانى
سمعان علشان العالم كله ، لكن كل الحزن اتحول لفرح لما عرفت انه قام من الأموات وامنت بكل الكلام اللى كان بيقوله وجاى النهارده علشان افرح بالقيامه فى بيته ووسط شعبه
مينا انت قد كده فرحان علشان السيد المسيح قام من الأموات
سمعان طبعا ده لولا قيامته كان زماني عايش أسير لحكم الموت ومهما عملت هايكون مصيري الجحيم
عن اذنك علشان هاتاخر على القداس .{ يخرج سمعان ويبقى مينا وحيدا}
{{ يظهر شخص اخر ويقف بجوار سمعان ويوجه الى سمعان كلامه}}
بطرس انت لسه مادخلتش الكنيسه واقف تعمل ايه فى الحوش
سمعان كنت واقف اتكلم مع ..................... هو انت اسمك ايه
مينا اسمى مينا
بطرس اسم جميل على اسم قديس عظيم
سمعان مينا مش عاوز يدخل القداس
بطرس معقول يبقى عندك كل البركات دى جوه الكنيسه ومش عاوز تدخل تحضر القداس ....... احنا يا ابنى تعبنا كتير قوى وسال دمنا علشان الايمان الصحيح يوصلكم انت وكل العالم الارثوذكسى
مينا سال دمكم ليه هو حضرتك مين
بطرس انا واحد من اللى كانوا مع الرب يسوع خطوه بخطوه لكن هربت عند الصليب رغم انه قالى
على هذه الصخرة ابنى كنيستي وقلتله لو انكرك الجميع انا لا انكرك لكن للاسف أنكرته وخفت من
جاريه لكن لولا محبته كان زمانى هلكت
مينا مش فاهم ايه لازمه انه ينزل للجحيم وبعد ثلاثة ايام يقوم ويظهر للتلاميذ ويقول لهم انه قام وليه يوافق من البدايه انه يتصلب زى الخطاه ويتهان زى العبيد
بطرس لانه الوحيد اللى بدون خطيه وهو اللى قادر انه يموت ويقوم تانى من الاموات لكن علشان يقوم معاه كل اللى سباهم الشيطان فى الجحيم
سمعان وعلشان يقوى التلاميذ وياكد قيامته ظهرلهم علشان يكونوا شهود عيان ويكرزوا بالقيامة
{{ يظهر شخصين اخرين ويقفوا بجواهمر ويوجهوا الى بطرس كلامهم}}
توما أنت لسه مادخلتش الكنيسه القداس خلاص ابتدى
سمعان انا رايح عن اذنكم وانت يا مينا حاول تدخل الكنيسه بلاش الشيطان يدحك عليك .{ يخرج سمعان} توما هو انت مش عاوز تدخل الكنيسه
بطرس اصل مينا بيقول ايه لازمة القيامه وماكنش فى داعى لنزول المسيح للجحيم انا هاسيبكم مع مينا تفهموه وانا هاروح الحق القداس { يخرج بطرس}
مينا ممكن اعرف مين حضرتك
توما انا من الناس اللى فرحوا بقيامة السيد الرب من الاموات لكن مكنتش مسدق ولان السيد المسيح محبته عظيمه جدا ظهر لى مخصوص مع باقى التلاميذ وخلانى احط ايدى مكان الحربه واشوف مكان المسمار علشان اامن واسدق انه هو الرب يسوع القائم من الاموات
مينا { ينظر الى يوحنا} ومين حضرتك
يوحنا انا كمان كنت من تلاميذ يسوع وانا الوحيد اللى كنت بجوار الصليب المقدس وكنت سامع نبض قلبه المجروح علشان خطايانا لانى دايما كنت باسند راسى على صدره ولما جت مريم المجدليه وقالت ان القبر فارغ جريت وشفت القبر والاكفان وامنت وجيت النهارده علشان افرح بقيامة السيد الرب مع كل الشعب
مينا طيب ليه كان لازم يقوم من الاموات
توما لانه لو مكنش قام وظهر لنا كنا هانستلم الايمان الارثوذكسى الصحيح من مين ؟
يوحنا هو مات علشان يسدد الدين لان اجرة الخطيه هى موت وقام علشان يقومنا معاه ويرسلنا علشان نكرز ونبشر بالقيامه ونكون رسل ليه
مينا اه فهمت علشان كده بولس الرسول بيقول { ان لم يكن المسيح قد قام فباطله كرازتنا وباطل ايضا ايمانكم
توما برافو عليك يا مينا كمان لما السد المسيح قام ظهر لناس كتير جدا من المؤمنين وشافوه وامنوا بيه
وكلنا بنهتف ونقول { اين شوكتك يا موت اين غلبتك يا هاويه }
{{ يظهر شخص اخر ويقف بجوارهم ويوجه الى الجميع كلامه ويكون لابس تونيه}}
الملاك انتو لسه واقفين تتكلموا وخلاص تمثلية القيامة هاتبتدى
مينا ايوه تمثلية القيامة دى اللى انا مش فاهم منها حاجة وكمان حضرتك لبسك غريب دا حتى غير لبسهم
هوه حضرتك واحد من التلاميذ
الملاك لاء انا من طبيعه تانيه خالص غير طبيعتهم
مينا وكنت حاضر احداث القيامه
الملاك طبعا انا اللى دحرجت الحجر عن باب القبر وكمان بشرت النسوه بقامته من الاموات ولما هبط السيد المسيح للجحيم كنت موجود معاه وشفته وهو بيحرر كل ارواح القديسين اللى كانت فى قبضة ابليس من اول ابونا ادم
مينا السيد المسيح هبط للجحيم ازاى مش احنا بنقول انه قام وصعد للسما يبقى ازاى هبط للجحيم
يوحنا لو انت بتحضر القداس وتركز كنت لاقيت اجابه لكل اللى بتسال عليه ده فى تمثلية القيامة
مينا اساسا تمثلية القيامة انا مش فاهم منها حاجه ، بنطفى النور وبعدين الشماس يتكلم وابونا يرد عليه
ايه الموضوع الله اعلم
توما انا هفهمك يا مينا لما نقرا فى المزمور مع داود النبى اللى بيقول {{ اخرجهم من الظلمة وظلال الموت وقطع قيودهم لانه كسر مصاريع نحاس وقطع عوارض حديد }} فاهم يا مينا
مينا طبعا مش فاهم حاجه
يوحنا اللى كانوا فى الظلمة وظلال الموت همه آبائنا الأوائل من اول أبونا ادم لغاية موت السيد المسيح
الملاك لان قبل الفداء كان اى إنسان يموت كانت خطية أبونا ادم اللى كلنا ورثناها بتخلى جميع الارواح فى قبضة إبليس فى الجحيم لان أجرة الخطية هي الموت
يوحنا لكن لما رب المجد مات فداء عن خطايانا نزل بروحه للجحيم وراح عند ارواح القديسين اللى سبقوا وماتوا وراحوا الجحيم
الملاك وطبعا الارواح دى لان عليها حكم الموت كانت مسجونه وكان فيه ملايكه حراس واقفين عند الابواب وممنوع ان اى روح تخرج من سجنها
توما وطبعا لما نزل رب المجد للجحيم كان معاه ملايكه وجنود سمائيين كتير جدا
مينا اه فهمت وإحنا فى الكنيسة لما بنطفي النور ده اشاره للظلمه اللى كانت عايشه فيها الارواح فى الجحيم قبل فداء السيد المسيح
يوحنا برافو عليك يا مينا وطبعا الملايكة اللى كانوا مع السيد المسيح وقفوا قدام ابواب الجحيم وقالوا
افتحوا ايها الملوك ابوابكم وارتفعى ايتها الابواب الدهريه ليدخل ملك المجد
مينا ده نفس الكلام اللى بيقولوا الشماس فى تمثلية القيامة
توما مظبوط وحراس الجحيم يسألوا مين هوه ملك المجد
الملاك وأول ما بنقول انه الرب العزيز القوى الجبار القاهر فى الحروب هو ملك المجد
مينا تتزلزل الارض كلها وتتكسر الابواب ويدخل السيد المسيح الى الجحيم زى ما بنعمل فى الكنيسه وكان فى صوت زلزله وتكسير
يوحنا اديك فهمت اللى بيحصل
مينا وبعد كده بنور النور فى الكنيسه كلها
توما وده رمز ان الارواح اللى كانت مسجونه فى الظلام شافت النور
الملاك النور الحقيقى زى ما قال السد المسيح عن نفسه انا هو نور العالم
يوحنا فهمت يا مينا واتعلمت
مينا الله عليكى يا كنيسه يا عظيمه كل حاجه فيها ليها معنى بتقربنا فيه من ربنا انا اسف سامحونى انا كنت غلطان
توما على فكره كمان خمس دقايق وتمثلية القيامة هاتبتدى
مينا ومستنين ايه بسرعه على الكنيسة
{{ يخرج الجميع مسرعين}}
{النهايه}
{{ ليكن كل عمل يا رب لمجد اسمك القدوس}}
