عزيزى القارىء ارضى باللى معاك

[Mary Naeem]

سنه ٢٠١١ شهر ديسمبر انا فاكر اليوم ده كويس جدا جدا ، كان يوم اتنين كنت راجع من شغلى ومش محقق التارجت واحتمال كبير ماقبضش اصلا وشايل هم الدنيا كله فوق دماغى ..
قاعد مع صحابى وانا دماغى فيها مليون حوار وعمال اقول حظى نحس وليه بيحصل معايا كدا يعنى ربنا مش قادر يبعتلى شغلانه حلوه ، وشايف نفسى اقل الناس حظ ..
وانا قاعد لاقيت امى بتتصل بيا تسال عليا وبتقولى ماتتاخرش عشان محضرالك العشا ..
بعد ماقفلت المكالمه لاقيت واحد صحبى جنبى قالى يابختك ..
اندهشت كدا وقولتله يابختى !!!!😳😳
ازاى دانا مافيش حاجه حلوه فى حياتى متمرمط شهر كامل فى الشغل وصارف من جيبى واحتمال ماقبضش كمان ..
قالى كفايه ان عندك ام بتسال عليك ومهتمه بيك وبتحبك ومراعياك ، احمد ربنا انت معاك نعمه وبص على الحاجه الحلوه اللى فى حياتك وبلاش تبص على اللى ناقصك عشان تعرف تفرح باللى معاك ..
من ساعتها وانا لو الدنيا اطربقت فوق دماغى لازم ابص على اى جانب حلو فى حياتى حتى لو كان الجانب الحلو ده عينى اللى بشوف بيها غيرى بيتمنى يشوف حتى لو طشاش يلمح حتى النور ..
عزيزى القارىء ارضى باللى معاك ..