لا بيتأخر و لا بييجي بدري

[walaa farouk]

هو القصد الإلهي كده ، ميعاد محدد بييجي فيه "لِكُلِّ شَيْءٍ زَمَانٌ، وَلِكُلِّ أَمْرٍ تَحْتَ السَّمَاوَاتِ وَقْتٌ: (الجامعة ٣: ١)" ..

طيب ليه واحد اتخرج و اشتغل و اتجوز بدري بدري ، وواحد تاني كل حاجة عنده اتأخرت ؟؟
و يعني ايه آيه " أَنَا الرَّبُّ فِي وَقْتِهِ أُسْرِعُ بِهِ». (إشعياء ٦٠: ٢٢) ؟؟

اللي خلص خطواته من بدري ، ده مش بدري و لا حاجة ، ده اللي كان مناسب له و لشخصيته..

و اللي اتأخر ، ده ما اتأخرش و لا حاجة ، ده بس ربنا شايف ان في فترة التأخير فيه حاجات تانية في شخصيته لازم تتغير قبل ما يتمم له طلباته ، يعني يقربه منه و يبني فضايله و يعده للخدمة و للابدية ..

و هنا تتأخر في شغلك او ترقيتك او زواجك او سفرك ، و بعدين في وقت بسيط جدا يديك رزق السنين اللي اتأخرتها ، و تتجوز و تخلف و تلحق اللي سبقك ..

و كده في كل طلبة تطلبها ، مش بيتأخر ابدا ، ده بس بيضبط و يرتب لك ترتيبات اهم ، و ح ييجي لك في الوقت المحدد الأنسب ليك و لحياتك كلها ، مش مجرد "طلبة" واحدة ..

ربنا لا بيتأخر و لا بييجي بدري ، بييجي في "وقته" ، يعني وقته هو ، محدده ليك حسب كامل حكمته و صلاحه..