كفاية خسائر

[walaa farouk]

طبعا مشاعر الغضب من المشاعر الواضحة والصريحة الطبيعية اللي موجودة عندنا كلنا بس اللي بيختلف طريقة تعبيراً عن المشاعر ديه يعني ممكن تلاقي شخص بيكتم جواه وفيه شخص ممكن يتنرفز ويتعصب ويعلي صوته وفيه شخص ممكن يكسر اي حاجة حواليه وممكن شخص يأذى نفسه أو اللي حواليه وفيه شخص ممكن يعبر عن غضبه بكل الطرق ديه.

المشكلة مش في مشاعر الغضب في حد ذاتها لأنها مشاعر طبيعية واكيد الحياة فيها مواقف كتير تثير غضبنا المشكلة في رد فعلنا لما نحس المشاعر ديه......

رد الفعل يبقى ايه.؟

1- اوعي تعملي اي سلوك وقت الغضب استنى لما تهدي وبعدين تبقى اتصرفي لان اي تصرف وقت الغضب مستحيل هيبقي التصرف السليم وممكن وقتها تضيعي حقك كلية بسبب كلمة او حركة بإيدك ، وحاولي تمسكي لسانك " معلش " مش هتخسري حاجة لما تأجلي رد فعلك وبعد ما تهدي اعملي اللي انتي عايزه .

2- ابعدي عن الموقف خالص اللي بيثير غضبك يعني لو فيه مشكلة مع ماما او بابا في البيت اسحبي نفسك من الموقف " بس طبعاً بعد ما يخلصوا كلامهم ، احنا مش عايزين نرفزهم اكتر " وقوليهم محتاجة اقعد مع نفسي شوية واقعدي في مكان تاني بعيد عنهم لحد ما تهدي لان طول ما انتي قاعدة معاهم هتحسي انك مقهورة وهتاخدي كل كلمة بيقولوها بحساسية ومش هتتقبلي منهم اي توجيه او نقد .

3- شوفي حد احكي معاه وقتها وخرجي كل غضبك في الكلام معاه حتي لو هتشتمي معاه " ولا يهمك " وقولي كل الكلام اللي انتي كنتي عايزة تقوليه وقت الموقف اللي اغضبك.

4- شتتي نفسك بأي حاجة زي انك تمشي او تتفرجي علي اي حاجة في التليفزيون او تسمعي اغاني او خدي شاور دافي ، او روحي اقعدي في كافيه واشربي المشروب اللي بتحبيه المهم انك تخرجي الطاقة السلبية اللي عندك في اي سلوك والا هتتكبت وهتلاقي نفسك بتتنرفزي علي حاجات ما تستاهلش.

* خرجي غضبك وما تكتمهوش المهم هتخرجيه مع مين وامتي وازاي .

النزفزة والعصبية والصراخ والصوت العالي والتكسير اسهل طرق انتي بتخرجي فيها غضبك وبتحسي براحة وقتها بس للاسف بتخسري خسارة ممكن تبقي بسيطة وتعدي وممكن تبقي كبيرة وتخسرك ناس مهمة في حياتك .

علي فكرة احنا مش هنقدر نسيطر علي غضبنا كلية وهتفشلي في اوقات انك تعرفي تسيطري علي غضبك بس لازم تحاولي مش هتخسري حاجة لو بدأتي . " كفاية خسائر" .

[Mary Naeem]

* خرجي غضبك وما تكتمهوش المهم هتخرجيه مع مين وامتي وازاي

[walaa farouk]

ميرسى على مرورك الغالى