ليتقدّس اسمك

[walaa farouk]

الفترة الاخيرة بقيت احس احساس غريب كدة ناحية ربنا .. احساس مش متعوّد عليه بس في نفس الوقت مش قادر امنعه بصراحة.. بقيت احس بالغيرة على ربنا .. ايوة بقيت "أغير" عليه..
استغربت؟ صدقني وأنا كمان مستغربني .. بس استنى هاشرحلك باغير عليه من ايه ومن مين!
بقيت أغير على ربنا من كل فشل وشر بننسبه ليه وهو ملوش دخل..
بقيت أغير عليه من كل حد بيتكلم بإسمه ومفهّم الناس ان الله باعته.. وهو بيكدب وبيخدم مصلحته الشخصية..
بغير عليه من كل الصور البشعة اللي الناس بتتصورها عنه .. زي أنه "جزار" يحب الدم والقتل، أو انه أناني هدفه الناس تعبده وخلاص، أو انه إله سادي يعشق تعذيب البشر لمتعته الشخصية .. أو انه "بارد المشاعر" مش حاسس بينا وبوجعنا ..
وبيبقى نفسي اروح لكل واحد افهمه أن ده مش الله اللي اعرفه.. حرام "تتبلّى" عليه بحاجات و اوصاف مش فيه ..
وفي نفس الوقت بقيت استغرب الناس اللي بكل ثقة تتكلم عن الله وتوصفه بحاجات اقل حتى من البشر .. زي انه ممكن يعمل شر أو يسبب مصايب أو يؤمر بكراهية وعنصرية ضد الناس ..
وبقيت اتعب اكتر من الناس اللي بتستخدم الله للوصول للناس والتحكّم فيهم .. بداية من اصغر متدين بيضحك على عقول الجهلة عشان يكسب وجاهة اجتماعية .. وصولاً لأكبر المؤسسات الدينية اللي بتنهب ملايين من جيوب الناس ومابتبطلش تقول اسم الله في كل موقف ومناسبة وسرقة علانية برضو .. والله ملوش علاقة تماماً بأي حاجة من دي ..
والكل جايب سيرته .. والكل بيألف قصة عن الله من خياله هو .. ويحط فيها اسم الله في الاخر .. وكأنه المفتاح السحري اللي بنوصل بيه للي عايزينه .. شهرة .. فلوس .. احترام .. جنس حتى .. واحنا عايشين حياتنا واسم الله في جيبنا نستخدمه منين ما نعوز ..
ومؤخراً ابتديت افهم الاية اللي كل يوم بصليها وانا مش فاهمها "ليتقدّس اسمك"، يتقدس يعني يبقى مُخصص .. وكأنه يسوع قاصد يقولنا في كل مرة تصلّوا اطلبوا أن اسم الله يكون مُخصص ليه هو بس، بتاعه هو بس .. مش ستار لحاجات أو رغبات أو آلهة تانية عملناها وبنلبسها اسم الله في النهاية ..
عشان كدة بقيت اصلّي أن ربنا يفضح الزيف والكذب اللي بإسم الله .. فا تُقع كل الصور والتشوهات اللي في ذهننا عنه .. ويبقى الله واضح واسمه بيشاور عليه هو بس .. مُخصص ليه هو بس مش لإله تاني!
فا ارجوك ركّز اوي قبل ما تجيب اسم الله في كلامك وتخيلاتك وحكاويك الكتير .. لأن اسم الله لازم يرجعله بقى من الاخر .. اتبهدل اوي واتنسب لحاجات كتير غيره ..
نصيحة اخيرة: لو أنت تايه من كتر الصور والتخيلات البشرية عن الله وعايز تعرف عنه منه هو شخصياً ..
اركن كلام الناس كله على جنب .. و بُص على يسوع .. بس كدة!