|
 |
 |
 |
|
رقم المشاركة : ( 1 )
26 - 02 - 2017, 07:12 PM
|
|||||||||||
|
|||||||||||
|
هو انت ليه يارب بتسمح بالمشاكل والمصائب و الكوارث لينا ؟؟ علشان تدمرنا .. ولا علشان بتكرههنا .. و لا علشان تخلص مننا ذنوب قديمة عملناها ؟؟؟ السؤال ده مافيش حد فينا تقريباً ماسألهوش بينه و بين نفسه للأسف مهما كانت درجة إيمانك. ليه يارب ؟؟ ليه يارب ؟؟ كل واحد فينا له حكاية حياة شكلاً و موضوعاً مختلفة عن غيره .. لكن كلها بتصب في نفس طريق الوجع الكتير .. و الفرح القليل للي بيعرف فقط يخطف لحظات الفرح. تحديداً بعد سن الثلاثين .. بتحس ان الدنيا بترزّع فيك فوق و تحت و بتوصل لمرحلة انك مش فاهم حاجة و تبص علي الحياة من فوق علي الكوكب كله انه بقى عبارة عن لعبة سخيفة .. و مستنيها تخلص بسرعة يمكن ساعتها ترتاح. الحياة = الموت قطبين الحياة لما حد بيتولد .. كل الناس بتفرح بمجية للدنيا و تلاقيه هو الوحيد اللي بيصرخ ولما إنسان بيموت .. بتلاقي كل الناس بتصّرخ عليه و هو في الأغلب بيكون انطلق لحياة الامحدود و الحرية والراحة طيب نرجع للسؤال الرئيسي لكلامي هل فعلاً ربنا قاعد بيتبسط بالكوارث و يفرح ان البشر صنعة يدية بتٌصرخ و بتعاني ؟؟؟ لا طبعاً كل واحد فينا مخلوق برسالة شكل كل واحد فينا اه ترس جوة ماكينة كبيرة اسمها الحياة لكن الترس ده لو مش موجود الحياه كلها بينقصها شيئ مهم يعني باختصار سر وجودك علي الكوكب ده ورآه حكايه كبيره ورسالة واضحة من قبل حتي ماتتوجد هنا يعني انت حد مهم و للأسف الكتير منّا .. عايش كده وخلاص قاعد ينعى حظة و بخته قاعد فقط يبكى علي حاجة ماطلهاش ولا حد سابه و مشي و لا هدف ماحققوش قاعد فقط مكتآب و شايل حزنه و داير بيه يصحى بيه و ينام بيه من غير ما يفكر انه لسه ماعملش اللي عليه او لسه مش فاهم ربنا يقصد ايه!! بيكون ربنا عاوزك في رسالة محددة تعملها وانت مش راضي تسمع قافل ودانك وعمال تبص علي الماضي و محلك سر مشلول الحركه و الفكر علشان كده ربنا بيتصرف بذكاء شديد يقوم باعت تجربة كبيرة بتسميها احنا كوارث لكن عند ربنا .. اتصور ليها معني تاني و هي كلمة نٌضجْ نٌضج لشخصيتنا الفاضية نٌضج من مرحلة الطفولة .. لمرحلة المسؤلية و الحكمة نٌضج من التفاهه .. للأتزان نٌضج من عدم فهم أهمية الأشياء .. لمرحلة الفهم باتفه و اصغر الحاجات اللي في ايدك نٌضج اني اخيراً ابتدي اشغل عقلي وانا بختار .. مش بس قلبي ( علشان كده ربنا حط الراس اللي فيها العقل فوق خالص و حط القلب تحتها ) تعرف ان أغلى انواع الحجارة .. بتيجي من البراكين ؟ تعرف ان اجمل المناظر الخلابة اللي في الطبيعة .. ناتجة عن كوارث طبيعية و زلازل ؟ تعرف ان اكثر ناس مشهورة بعطائها و قداستها هي اكتر ناس اتعرضوا لمصايب و مرار ؟ بس مين الذكى اللي يفهم ؟؟ و مين اللي جوه المصيبة و في عز اختبار صبره يحول الوجع والدموع .. لطاقة من النضج و تكون وقود غالي التمن يقدر يكمل بيه حياته و يمد ايده لاخواته في البشرية اي ان كان لونهم وجنسهم و دينهم و اعمالك وقتها هاتكون الحصالة اللي فوق اللي بتحوش فيها الخير و البر و الرحمة وهى دى هاتكون اثمن ماتملك لما تقابل ربك. وجودك هنا ليس هبائاً وجودك هنا وراه رسالة مهمة ولازم تأديها على اكمل وجه لازم تفلسف الوجع ولازم تٌدرك أهمية كل حاجة حواليك مهما كنت شايفها صغيرة و مالهاش قيمة لازم تشكر و ترضى باللي ربنا حطك فيه ساعتها هاتلاقى نفسك مش بس بتطيب نفسك بنفسك لا هاتلاقي نفسك سند و ظهر للي حواليك ربنا يدينا عقول مستنيره نقدر من خلالها نفهم و ننضج و نوصل للمعنى الحقيقي من وجودنا هنا و نكون نور ينور للي حوالينا طريقهم 🤗 امين .. امين 
|
|
العرض الشجري