اسمعها تكسبها....اسمعيه هتكسبيه.

[Rena Jesus]

تكلم حتى أراك!!

ربنا خلقنا بنتكلم من مكان واحد وبنسمع بودنين.. حكمة إلهية واضحة عن أهمية السمع التى تفوق الكلام، وخلق اللغة للتواصل؛ وبالتواصل تنمو المحبة.

أعظم راجل على كوكب الأرض اللى بيعرف يسمع الست، وخصوصًا وهى بتتكلم فى موضوع مش مهم..
زى أنها اتخانقت مع الكوافيرة اللى عملتلها كيراتين وراحت عند كوافيرة مديحة..
فيقوم بعد نص ساعة هرى فى القصة يقولها..
عادى الكوافيرات غلسين حبيبتى المهم شعرك طالع حلو أوى على فكرة..
فيديها طاقة إيجابية لمدة أسبوع قدام،

أو تحكيله أن الطماطم خضرا وسعر البامية نار،
وتنقل الرغى فجأة على حوار الجزمة اللى طلبتها من على الانستجرام زى بتاعة سمر فى العشق الممنوع.. أوريهالك؟..
ولا هو عارف مين سمر ولا شاف العشق الممنوع بس يقولها ماشى حبيبى ورينى..

الراجل اللى بيسمع الست ويشاركها فى يومها من غير ملل ولا اهتمام ظاهرى ولا غلاسة من نوع
"بس بقى وأنا مالى الكيراتين على الجزم على البامية.. أنا مصدع ماترغيش"،
أو بيبص فى تليفونه، أو هربان طول الوقت برة البيت؛
بيخسرها وبيخسر معاها سنين عمر بتعدى،
وبتتغير من غير ما يفهم هى اتغيرت وبطلت تحبه ليه..
اسمعها تكسبها.

وكذلك أعظم ست هى اللى بتسمع هموم الراجل وهو راجع من شغله تعبان،
وبيتكلم عن ارتفاع سعرالبنزين، أو خناقة فى الشغل، أوعربيته اللى اتخبطت،
من غير ما تقوله أنا مصدعة،
ولا كفاية عليا مشاكل عيالك، أو تنتقده بسخرية؛
لحد ما يبطل يوم ورا يوم يفضفض معاها ويستبدلها بأصحابه على القهوة؛
الست الذكية تشارك الراجل فكرة سياسية،
أو تتفرج معاه على مباراة كرة قدم بيصرخ ويزعق قدام التليفزيون علشان فريقه يكسب،
من غير ما تقول لنفسها وأنا مالى بالسياسة أوالكورة أوأحدث العربيات..
اسمعيه هتكسبيه.

أحيانًا البشر بتكتفى بالرغى عن الاهتمامات المشتركة بينهم فقط، مش بتحاول تقتحم دايرة الآخر الغير مشتركة وتسمعه،
فبالتالى الست بتحكى لأمها وأختها وصاحبتها وهو بيحكى لأبوه أوصحابه..
وبالسنين هيصحى كل واحد منهم الصبح مش عارف هو التانى بقى مين؟!

الاحتواء بالودان..
بيزرع مساحة شاسعة من الصداقة وعشرة العمر، وزواج لا يتخلله خرس يومى ..
اسمعوهم تملكوهم.