سامحنى

[walaa farouk]

وسامحني على كل علاقة مُرهقة.. مُتعبة.. فضلت ماسك فيها وأنا عارف انها بتموتني بالبطئ..

سامحني على كل باب موارب سبته يتوهني وفضلت سنين كدة لا طايل سما ولا أرض..

سامحني على كل سكة نهايتها موت، فضلت مكمّل فيها وعمال أعند معاك وبغبائي مش عارف ان النهاية كل مدى بتقرب وأنا الوحيد الخسران..

سامحني على كل شخص مكانش في خطتك وأنا اتمسكت بيه، وكل شخص بيقربني منك وانا طلّعته من حياتي لأنه بس مش على مزاجي..

وسامحني على فشلي اللي تخيلتك أنت السبب فيه، ونتايج قراراتي الغبية اللي نسبتهالك وجرحتك بكلامي بسببها..

سامحني..