الخميس الفجر كان ميعاد مش معمول حسابه مع ناس كتير ... ميعاد نهاية مع البعض و ميعاد بداية مع البعض الآخر.. فيه طيار شاب بدل الرحلة مع طيار تاني كان مفروض يطير الرحلة دي و حصلت ظروف منعته ... فيه ناس غيرت ميعاد سفرهم يوم قبل او بعد الحادث لظروف مختلفة و فلتوا .. فيه عيلة كاملة كانوا سوا علي الطيارة المنكوبة ... فيه ام كانت راجعة مع بنتها بعد ما اشترت فستان فرحها.. فيه واحدة كانت بتتعالج من مرض السرطان و بقالها 5 سنين رايحة جاية علي فرنسا و خفت و نصيبها تنتهي حياتها علي الطيارة دي.. فيه ايادي شر منتشرة في كل مكان في العالم و في كل وقت.. قصص كتير موجودة في حادث سقوط طيارة مصر للطيران الجاية من باريس.. كان ممكن اي حد فينا يكون علي ميعاد مش معمول حسابه جوة الطيارة دي.. فيه درس و رسالة بتطاردني من ساعة ما سمعت الخبر الأليم ده. .. اقف لحظة و احسبها صح .. ما تضيعش وقت لأنه ما فيش وقت.. اهدي و فكر بعيد عن دوشة و لبخة الحياة اليومية السريعة .. اعمل جرد لحياتك .. رتب اولوياتك .. صفي حساباتك مع الناس بحيث ما تكونش مديون... ظبط امورك و كأنك هتسيب العالم بعد ساعتين مش قرنين .. خللي عينك فوق علي السما و اختار الغالي .. و شيل عينك عن الرخيص اللي تحت و سيبك من الفاني ... الكلام ده بقوله لنفسي اولا قبل اي حد تاني ..
20 - 05 - 2016, 09:03 PM
العرض الشجري