انت ناجحك فى ايد فريقك لو كسرتهم هاتخسر

[Mary Naeem]

زمان فى درس الفرنساوى كان استاذى دايما بيحبطنى مهما احل واذاكر يقولى لا مش هو ده المستوى اللى يخليك تجيب درجه حلوه ، لا انت بتلعب ومش مركز ، لا انت مش فاضى للمذاكر انت مش بتفهم بسرعه ...
حرفيا جبت اخرى فى المذاكره وهو لسه مصمم على رايه فيا ، لدرجه انى كرهت الفرنساوى ومستوايا بدأ يهبط فعلا ..
اخر تلات شهور قبل الامتحان ، روحت لمدرس تانى اخد عنده مراجعات كان كل سوال احله يقولى برافو الله ينور ممتاذ ، ولو غلط فى سوال يقولى انت شاطر جدا بس ناقصك تراجع على النقطه دى وانا واثق انك مش هاتغلط فى القاعده دى تانى لانك ذكى وبتجمع المعلومه بسرعه ..
فى التلات شهور دول انا مستوايا اتحسن جداااا وقفلت الفرنساوى اخر السنه وجبت النهائيه ، وحرفيا التلات شهور المراجعه دول من احلى الايام اللى حسيت فيها بشطارتى وتفوقى لدرجه ان بعد ١٨ سنه منها انا فاكر كل تفاصيل الايام دى ومدى ساعدتى فيها كانت قد ايه ، تلف الايام وتدور واقابل المدرس الاول وسلم عليا وقولتله فاكر لما كنت بتحبطنى ، قالى انا كنت بقولك كدا عشان اشجعك تطور اكتر .. دى كانت الصدمه بقى ...
رسالتى هنا لكل مدير شغل ، انت وفريقك فى مركب واحده لو كسرت حد منهم بكلام محبط على اساس انك كدا بتعلمه يطور من نفسه احب اقولك غلط انت كدا بتغرق المركب كلها وانت اول واحد هاتغرق علمه ازاى يطور من نفسه بس باسلوب تشجيعى بلاش الكلام الجارح بلاش مقارانات بين زمايله بلاش تقلل منه بلاش تحسسه دايما انه مابيفهمش وانه مافيش منه فايده وانه مهما يعمل حاجات صح وانجازات قويه بتنسى كل ده عشان حاجه واحده غلط ، انت ناجحك فى ايد فريقك لو كسرتهم هاتخسر ..