|
 |
 |
 |
|
رقم المشاركة : ( 1 )
27 - 06 - 2025, 02:04 PM
|
|||||||||||
|
|||||||||||
|
عيل صغير وقفنى فى الشارع بيقولى عمو ممكن ترفعلى الحاجه دى على كتفى .. ببص عليه لاقيت معاه شوالين اكبر منه مليانين هدوم.. قولتله انت رايح فين قالى هاركب الاتوبيس اللى هايطلع على كوبرى التجنيد ، قولتله كويس فى طريقى .. شيلت انا شوال على كتفى والشوال التانى سندته عليه ومسكته بايدى التانيه ، لغاية ما روحنا عند الاتوبيس وركبنا .. قعدنا انا وهو نحكى مع بعض .. فى عز واحنا قاعدين لاقيت الولد طلع فلوس وقطع تذكرتين، قولتله لمين التذكره التانيه ، قالى ليك ؟؟ انا بصيت كدا 😳😳 دانا قد عمرك تلات مرات ، انا اللى مفروض ادفعلك .. قالى انت ساعدتنى وده اقل واجب اقدر اعمله معاك .. طريقة كلام الولد تحس انك قاعد مع راجل ٥٠ سنه ، انا حسيت انه اكبر منى … الواد فى كلامه فاهم وواعى وعارف هو عاوز ايه وبيعمل ايه .. مع العلم الولد عنده ١٢ سنه وبيشتغل مع تاجر ملابس ، هو اكبر اخواته .. وفوق كل ده بيدرس والإبتسامه دايماً على وشه .. بالرغم ان اللى فى سنه ، قاعد على الكمبيوتر والموبيل وفاتح الكرتون على اليوتيوب .. لكنه متحمل المسئوليه اجدعها من اى راجل تانى.. عجبنى جداااا لما قولتله ، انت عايش سن مش سنك قالى انا عايش ظروفى 😉 عزيزى القارىء الرجوله والحكمه وتحمل المسئوليه عمرها ماكانت بالسن ، ممكن تلاقى راجل شايب بس عايب وعيل عنده ١٢ سنه بس بمية راجل لما تحدد اللى قدامك جدع ولا لا بص لظروفه مش سنه 😉 
|
|
العرض الشجري