ينتهي بالتقادم.........

[Rena Jesus]

في مواضيع لازم تنتهي بالتقادم ، بهدوء ، بدون حتى ما نتفق أننا هننهيها ، فجأة كدة نكتشف أنها بح خلصت ،
خلصت بالسكوت والنسيان او التناسي ،
مثلا زي صداقتنا القديمة لما نتقابل صدفة في الشارع ونكتشف أننا مش لاقين كلام نقوله لبعض مع أننا كنا أقرب صحاب أيام المدرسة ، فنتفق على لقاء بنبقى عارفين كويس انه مش هيحصل ، بس ضرورة الموقف بتجبرنا نتفق على مقابلة قريبة جايز نلاقي كلام! ..

زي حد كنا بنحبه وبعد فترة بُعد طويلة اكتشفنا اننا مش شبه بعض وإن كل الكلام اللي كنا بنأكد فيه أنه أكتر حد فاهمنا بقى كلام مش عملي وبنكتشف ساعتها بس إننا جايز مكناش عارفين نفسنا زمان أو جايز اتغيرنا أوي لدرجة إننا مبقيناش إحنا فللأسف بنقف قدام رجوعه بنفس الشغف ونفس اللهفة ونفس النظرات اللي فيها تمني ورغبة وإحنا فاضيين تماماً مش قادرين ننطق وبنضطر نبتسم ونذوق الكلام عشان إحنا ناس ذوق بس مش أكتر!

زي حلمك اللي مكملش ، زي الكلية اللي معرفتش تدخلها ولما كبرت عرفت انك لو كنت دخلتها كنت هتبقى تعيس لأنك عمرك ما حبيت تكون دكتور/ مهندس/ مبرمج/ الخ ..

زي شعورك بالغضب والسخط تجاه أبوك ولما بتكبر بتكتشف أد ايه هو كان بيحاول يسندك

زي البنت اللي كان نفسك تبقى كل حاجة في حياتها واكتشفت انك كنت مجرد ضلفة للدولاب أو باب للأوضة ، اكتشفت انها كانت بس عاوزه تحس ان حاجتها جوه الدولاب ومش هتقع أو تحس ان الباب مقفول عليها لكنها عمرها ما هتحب الضلفة أو هتحضن الباب .. هي بس عاوزاهم يبقوا موجودين وبتقلق وهما مش في مكانهم ..

زي استاذك اللي كنتي بتحبيه وانت في ثانوي وكنتي فاكرة انه البطل اللي بيقوم بدور الحبيب والأب وعرفتي انه برفان ريحته حلوة طاير في الهوا، مجرد رسم عالرمال أو صورة على حيطة في الشارع، بورتريه جميل في شقة واحدة جارتكم، صوت حلو جاي من الراديو، بطل متصور بعناية في فيلم لكنه شخص عادي ، اكتشفتي انه كل حاجة حلوة بس مش عندك ومش بتاعتك ومش هينفع تكون بتاعتك عشان هو حياته قربت تخلص وانت حياتك لسه بتبدأ،

زي ايميلك على هوت ميل وياهوو وجزمك القديمة وأكونت الفيس اللي كان عليه كل صحابك واتقفل وحزنت جداً بس حاليا لو رجع مش هتعرف تستخدمه عشان بقى فيه أكونت جديد عليه الناس القديمة والجديدة ..

زي ندمك على غلطة عملتها وجه بعدها شعور باللذة بعد دموع التوبة والصلاه..

زي كل سلمة نهجت وانت بتطلعتها ونفسك هدي اول ما اتفتح الباب ، زي كل شغل سيبته وكل حد خسرته وكل ضحكة بتهف عليك وكل حاجة ليها علاقة بالبلد ، وكل حاجة مبتسيبش جواك أثر ، وكل شوق لغير الله ، وكل لهفة دفعت تمنها وجع ، وكل حاجة فكرت انها مش هتخلص وخلصت ..

في مواضيع مش لازم تركز كتير هي ازاي هتخلص عشان هي هتخلص هتخلص لوحدها وهتبدأ حاجات جديدة أحلى هتخلص برضو ..
فخليك دايماً عينيك مليانة ومتشغلش بالك باللي في ايديك .. ركز انك تبقى راضي من جوه .. من جوه جوه قلبك.

cpd

[walaa farouk]

ميرسي على مشاركتك الجميلة

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى

[ميرو]

ميرسي للموضوع الجميل ^_^

[Rena Jesus]

ميرسى لمرورك الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمرورك الغالى