لو كان عندي رقمك

[walaa farouk]

عزيزي_الله
كنت بتخيل لو التواصل بينا عبارة عن voice notes..
لو كان عندي رقمك ومسميك "بابا السماوي" على الواتساب..
وكنت أقدر في أي لحظة أفتح الشات وأسجّلك voice note..
أكيد كنت هبدأها بنفس الطريقة دايمًا:
"يا رب أنا مش عارف أبدأ منين."
ويسود بعدها لحظة سكون مش لأني خلصت..
بس لأني مش عارف أشرح..
وبعدين أكيد هلاقى إن كلماتى بسيطة مش مترتبة..
فبعد ما هسجل الvoice هتكسف جدًا من تفاهته..وهمسحه..
بس فجأة خطرلي حاجة..
هو أنا لما كنت صغير كنت بفكر قبل ما أنده عليك؟
دة أنا كنت بقف قدام المذبح فى الكنيسة وأقول بصوت عالى: "باباااا يسوع!"
وأنت كنت موجود وسامعنى..حتى لو كلماتى كانت بسيطة ومش مفهومة..
عارف يا رب..لو كان عندي رقمك..
كنت هابعت لك ڤويس كل ساعة..وحتى من غير مناسبة..
احكيلك عن كل تفصيلة فى حياتى من غير ما أحتاج أرتب الجُمل..
أكيد هتضحك معايا وهتطبطب عليا لما أنهار..
وكل اللي مستنيه منك..
إنك ماتزهقش من كلامى حتى لو كله "أه" و"أمم" وسكات طويل..
عشان عندى كلام كتير عايز أقولهولك..