|
 |
 |
 |
|
رقم المشاركة : ( 1 )
06 - 05 - 2025, 11:48 AM
|
|||||||||||
|
|||||||||||
|
ياريت نتعلم الحب البسيط منهم كنت راكب القطر انهرده الصبح ورايح المحافظه عشان اخلص شوية ورق ، وانا فى القطر لاقيت راجل كبير فى السن قصير ولابس جلابيه سوده وشال تقيل ، شعره ابيض ودقنه طويله ، ماسك سبحه ومعاه ظرف كبير ودايماً بيبص فى الساعه .. الراجل ده قعد جنبى ، وكل شويه يسالنى .. المحافظه قربت؟ وانا اقوله لسه يابويا .. فضل يسأل كتير .. قولتله انا نازل المحافظه يابويا اول مانزل هاقولك .. فضل يدعيلى جامد وملامح وشه باين عليها التعب والإرهاق الشديد وكأنه بيستعطف ربنا لشىء معين فى دماغه .. طول ما هو قاعد عمّال يتمتم بصلوات .. قولتله خير يابويا سيبها على ربنا .. قالى .. يارب ياولدى بس إزاى!! هاتتحل إزاى بس ؟؟ كان بيقولها وهو مغلوب على أمره وعينه لمعت وكأنه هايبكى.. قولتله خير يابويا فى ايه ؟؟ إحكيلى يمكن أقدر أساعدك .. قالى .. الأشعه دى بتاعت مراتى ، من شهر حست بوجع فى بطنها ، راحت لدكاتره كتير وكل واحد يقولها مرض شكل ويطلعلها علاج ومايجبش نتيجه ، الإسبوع اللى فات روحنا لدكتور فى المحافظه بيقولو شاطر قوى وبيروح يدى محاضرات فى مصر فى الجامعه هناك .. قالنا انه إشتباه بنسبة كبيره إنه ورم ، لأن كل الأعراض والعلاجات اللى مش جايبه نتيجه بتثبت انه ورم .. طلب اننا نعمل أشعه عشان يحدد نوع الورم ويبدأ معانا رحلة العلاج .. الراجل وهو بيتكلم كان بيبكى .. قالى دى مش بس مراتى دى كل حاجه بقيالى فى حياتى ، إحنا ربنا مارزقناش بعيال ، وانا وهى مالناش غير بعض ، لو حصلتلها حاجه انا هاموت ، مش هاعرف أعيش من غيرها ، ده يوم ماحجزوها فى المستشفى من شهر ، خوفت أروح البيت ، كنت بنام جنبها على الأرض وهى على السرير .. قاطعته فى الكلام وقولتله .. وأستحملت نومت الأرض!! قالى ياولدى وجع الأرض ونفسها جنبى ، أهون بكتير من انها تكون بعيد عنى . دى قلبى اللى عايش به .. من شدة كلامه وتأثره كانت عينيه بتبكى وانا عينا دمعت لا إرادى ، الراجل كان عامل زى الطفل اللى تايه من امه .. راجل كبير قوى فى السن لا يعرف يقرا ولا يكتب ، مايعرفش يعنى ايه اغانى رومانسى ولا مسلسلات تركى ، ولا فيس وقلوب وكل الكلام ده، إزاى حبه لمراته شديد قوى كدا .. ده كفايه كلامه أقوى من ألف قصيده .. أستاذنت منه اجى معاه عند الدكتور عشان أطمن ، كان عندى فضول عجيب انى أطمن على حالة مراته وبدعى من كل قلبى ان الورم يطلع حميد وتخف منه حتى لو بإستئصال .. الراجل الأول رفض عشان مايتعبنيش لكن انا إتحججت بأنه فى طريقى .. المهم روحنا ، ودخلنا عند الدكتور ، والراجل كان من شدة صلاته ودعواته كان جسمه كله بيتنفض .. بص الدكتور على الأشعه وفضل مركز جامد ، بعد كده حطها فى جهاز ينورها أكتر ، وبردو كان مركز .. بعد كده اتصل بالمركز اللى عمل الأشعه عشان يتأكد من معلوماتها .. بعد طول تركيز منه ، قعد على المكتب وقلع النضاره وقاله يابويا .. المدام مافهاش حاجه هم شوية إلتهاب وهاتخف مع العلاج .. الراجل من شدة الفرح ماكنش مستوعب ، لدرجة ان الدكتور قاله نتيجة الأشعه أكتر من خمس مرات عشان يستوعب ، ماكنش مصدق نهائى .. الدكتور فضل يضحك ضحة فرحه وقاله .. حبك ليها صنع معجزه ، ربنا سمع صلاتك يابويا 😍 الدكتور بص ليا وقالى ياريت نتعلم الحب البسيط منهم 😍 
|
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| شخصيات كتابية نتعلم منها {جارية عين روجل} |
| ياريت نتعلم نستر علي بعض |
| شخصيات كتابية نتعلم منها ( بلهة زوجة يعقوب جارية راحيل ) |
| درس من الصابونة ياريت كلنا نتعلم الدرس |
| ياريت كلنا نتعلم منه الحب والانسانيه |
العرض الشجري