بيعدولك كل نفس

[walaa farouk]

دول ناس قلبهم مش لحم زينا ، مغيرينه بحجر، مليانين سواد
و حسد و حقد..

يتمنوا لك زوال النعم اللي عندك ، بيعدوا عليك نفسك و ضحكتك و فرحتك و رزقك .. يكلموا عليك في ضهرك طول الوقت ،
و كأنك لقمة في زورهم، و لا عاوزين يبلعوها و لا يرجعوها..

انت قضيتهم و شغلهم الشاغل ، يزعلوا و يموتوا لو نجحت ،
و يرقصوا و يزقططوا لو سمعوا عنك اقل خبر وحش ..

يتمنوا لك الفشل كل صباح .. لو طالوا يأذوك
مش ح يفكروا لحظة و لا ح يتوصوا ثانية !!

بس الحق يتقال : بيصلوا و يصوموا و يسجدوا و يعبدوا،
ازاي و بأي وش مش فاهم !!

نفس الناس دي لما تحتاجلك تتمسكن و تستضعف
لغاية ما تاخد غرضها منك ، و تسيبك و هي بتدعي اكتر عليك !!

الناس دول ما لهمش دوا ، واللي حاول يعالجهم تعب اكتر
، الا اللي ربنا رحمه ..

حلهم انك تبعد عنهم و تتقي شرهم ووجع قلبك معاهم ..

في نفس الوقت ده فيه ناس ربنا بدرها في الكون علشان تسعد الكل و تسعدك من غير اي مقابل ..

و قبل الكل ، عين الله الحارسة اللي من غيرها
كان الأشرار دمرونا و نحرونا و ذلونا ،
علي رأي الآية الخالدة "لولا الرب الذي كان لنا عند ما قام الناس علينا،
إذا لابتلعونا أحياء (مزمور ١٢٤: ٢ و ٣) " ..

شر الشرير يبطله إله كل خير ، و يحول كل أذاهم لخير مضاعف ..