زوادة اليوم: الحياة مدرسة

[souad jaalouk]

زوّادة اليوم: الحياة مدرسة
بيخبرو عن بنت زغيرة راحت اوّل يوم عالمدرسة و بس اجت سألتها امها شو تعلّمتي اليوم؟ جاوبت هيّي و معصبة: رحت تا اتعلّم و اخلص قامو ما علمونا شي و قالولنا تا نرجع نروح بكرا!
ضحكت الأم و فسّرتلها انّو التعليم هوّي مشوار طويل و فيه مراحل و بدّو صبر مش بيوم واحد منتعلّم كل شي بس قد ما تعبنا بس نوصل للآخر رح نفرح كتير باللي حقّقناه و هيك نحنا بيقولو الحياة مدرسة و نحنا بدنا نحقّق كل شي بسرعة و نوصل للي بدنا ياه بوقت قصير و بدون جهد و بالمقابل الحياة بتقسى علينا و منواجه مشاكل و صعوبات كتيرة بس بالآخر بس نوصل للقاء مع الرب و للحياة الأبدية منعرف انّو ولا نقطة عرق و ولا لحظة تعب و ولا ثانية زعل و بكي راحت ضيعان. كلّو مكتوب بسجلات السما و كل واحد بيتكافأ قد ما كان امين عا وزناتو...اصبروا...النطرة حرزانة! الله معكن