حتي لو قلقت

[walaa farouk]

أوعي تصدق ان فيه حد ما بيقلقش ، دي طبيعتنا،
ببساطة لأننا مش ماسكين حقيقة تطمنا، و لا شايفين الحل اللي جاي..

طبعا ربنا عارف خيرنا و بيرتبه و عاوزنا نصدقه علشان ما نتعبش من القلق،
مش لأنه زعلان مننا.. ربنا أب حنين، و لما بيلاقينا قلقانين مش بيلومنا و هو غضبان مننا ،
لكن بيستوعبنا و بيقدر خوفنا ..
اوعي تزود علي قلقك قلق تاني من زعل ربنا منك ..

حتي لو قلقت استحمل نفسك الخايفة شوية ،
و ح تعرف بكرة ان كل اللي كنت قلقان منه ما حصلش و لا ح يحصل..

شوية قلق ببيعلموك أنك بس لسه صغير و محتاج تتحامي في ربنا اللي بيحبك..

و انت قلقان بيحبك ، و ح يحل لك اللي قالقك..