|
 |
 |
 |
|
رقم المشاركة : ( 1 )
21 - 04 - 2018, 07:14 AM
|
|||||||||||
|
|||||||||||
 الخيط_الأخير ..... كلنا بنمر بمشاكل مع الطرف التاني ومفيش حياة مهما كانت سليمة وماشية صح خالية من الثغرات والمشاكل .... أوقات بتعدي بسهولة جدا وأوقات بتتعب فينا وأوقات بتتكرر نفس المشكلة أو بنقف علي نفس السبب ومنعرفش نغيره .. وفي جميع الأحوال الدنيا بتمشي .. مشكلتنا كلنا اننا بقي عندنا ضعف وقلة ثقة في نفسنا وبقينا بندور بس علي حد أو نص تاني نتسند عليه وبننسي نفسنا مع أننا لو فكرنا دقيقة واحدة بس وفهمنا الحياة صح هنلاقي أن الفراق أمر محتوم في النهاية مهما طالت المدة ... لأننا بننسي ان الموت كمان نهاية محتومة و فراق . سواء خيانة أو خناق أو فراق بسبب النصيب أو الموت .... كله في النهاية اسمه فراق حبيب والنتيجة واحدة .. بنحس بالوحدة والوحشة .. أما الندم فده بيختلف من شخص للتاني وعلي حسب نوع النهاية .. كلنا بدون استثناء للأسف ظالمين ... لأن فينا الأناني أوي واللي عايش لنفسه وبس أو اللي بيقع في الحب وبيسلم روحه وبيضحي بالكامل فبينسي نفسه خالص ويفوق فجأه يلاقي كتير من عمره راح .. محدش فينا بيوازن ومحدش فينا بيشارك بالطريقة الصح وكأن الحب طرف واحد بس ... حتي وقت المشاكل للأسف بنسمع رد واحد ... أنا عملت كتير وكفايه لحد كدا أو ليه هو ميعملش أنا الست وهو الراجل .. أو هي بقت مهمله ومبتسمعش كلامي وكرامتي وأنا الراجل .... وبننسي أن الحب مشاركة وبننسي كمان أننا في البداية ركنا شخصياتنا الحقيقية علي الرف وبنطلع كل الحلو ونحارب علشان نمتلك قلب الطرف التاني وبعد ما نمتلكه ونتأكد أن كل حاجة خلاص وتمام بنبتدي نفرض شخصياتنا بالعافية وتبتدي المشاكل ورا بعض ... .. وذي ما قلت حتي الموت نوع من الفراق يعني مش لازم خان او بعد ... ابني نفسك صح واللي هيحبك بجد هيرفعك ويساعدك ويزود سعادتك ويشاركها غير كدا اسمه تهريج وتضيع وقت وعلاقه نهايتها الحتمية فشل ... يعني بمعني تاني كلنا مذنبين والغلط علينا كلنا طالما نسينا ان اي مشكله هتضرنا احنا الاتنين واننا هنعيش مع بعض يعني المفروض نتعري قدام بعض ونشارك بعض ونضم بعض ونركن مخاوفنا علي جنب ... نبطل الأنانية اللي بنغرق فيها اول ما نحب .. شعور الفرحه اللي بتتمناه مينفعش تاخده كله لوحدك وعمرك ماهتحسه وانت عمال تاخد وبس من غير ما تدي ..... في وقت معين بيكون التمسك بالعلاقة أمر متعب و يسبب أذي أكتر من أنك تكمل فيها بس أغلبنا بيهرب من الحقيقة ومبيحبش يواجهها ويفضل يحارب بكل الطرق انه يصلح في علاقة انتهت فعلا .... ويحط نفسه تحت ضغط نفسي رهيب علشان خايف يواجه الحقيقة وخايف يصدق أن كل حاجة انتهت ... بس في النهاية ومهما طال هروبك هتواجه الحقيقة شئت أم أبيت ... يبقى كل ما ننهي علاقة فاشلة أسرع هنتعافي أسرع و هنكمل حياتنا بشكل أحسن ... طيب إزاي نعرف انها نهاية وانها مش مشكلة عادية ؟؟!! 1. لما نلاقي اتصالاتنا ببعض قلت وبنهرب من مواجهة بعض والشغف اللي ما بينا راح والمعاتبة بقت تقيلة أوي علي قلوبنا .. ولما ندخل ناس ما بينا تحل لنا مشاكلنا .... 2. لما الطرف التاني يحسسك ان كل حاجة بتعملها غلط .. تصرفاتك غلط وكلامك غلط وردود فعلك كمان غلط وتحس بخوف وتلاقي العلاقة إتحولت لضغط عصبي بالنسبالك .. وخلاص مبقاش في طريقة للتعامل بهدوء . 3. لما الإعتذار ميبقاش ليه أي معني ويفضل الطرف الثاني يكرر نفس الغلطات والحاجات اللي انت بتضايق منها .. وتلاقي اعتذاره مبقاش ليه أي طعم بالنسبالك .. 4. لما الكلام ياخد شكل الخلاف الدايم بعد ماكان واخد شكل هادي أو مثلا كان يتخلله الضحك والهزار وقت العتاب .. 5. أي علاقة طبيعية ناجحة بيتغاضي فيها كل طرف عن بعض عيوب التاني ... فلو مرة واحد بقي مصر يغير كل حاجة فيك يبقي أكيد في حاجة غلط .. 6. طبيعي وجود الغيرة بين الطرفين .. لكن لما تتحول لشك في الفعل وشك في الكلام وشك في كل حاجة يبقي أكيد العلاقة بتدهور وبتقرب من النهاية .. 7. لما خوفك من جرح مشاعر الطرف التاني يبقي هو السبب الوحيد لاستمرارك في العلاقة. 8. لما يكون المبدأ واحدة بواحدة والبادي أظلم ... وفي النهاية .... ************** لما طرف يضطر أنه يتنازل عن كل حقوقه ويضحي بروحه وبكرامته ويبقي مستعد انه يشيل قلبه ويقدمه هدية للطرف التاني والتاني مستمر في قسوته مبيقدمش أي نوع من التنازلات ... هتبقي الأولوية هي الحفاظ علي شكل العلاقة وبس ... وتتحول العلاقة من سعادة لضغط عصبي ..!! ويبقي كل اللي باقي خيط ..... خيط رفيع .... وهو الخيط الأخير ..!!! يا نقطعه ... يا يقطعنا ... 
|
العرض الشجري