لا تخف..أمن فقط

[sama smsma]

تنويعات علي اوتار انجيل مرقس
نغمة ٢٠ ...تتمة اصحاح ٥
لا تخف..أمن فقط
1 وَلَمَّا اجْتَازَ يَسُوعُ فِي السَّفِينَةِ أَيْضًا إِلَى الْعَبْرِ، اجْتَمَعَ إِلَيْهِ جَمْعٌ كَثِيرٌ، وَكَانَ عِنْدَ الْبَحْرِ.
22 وَإِذَا وَاحِدٌ مِنْ رُؤَسَاءِ الْمَجْمَعِ اسْمُهُ يَايِرُسُ جَاءَ. وَلَمَّا رَآهُ خَرَّ عِنْدَ قَدَمَيْهِ،
23 وَطَلَبَ إِلَيْهِ كَثِيرًا قَائِلاً: «ابْنَتِي الصَّغِيرَةُ عَلَى آخِرِ نَسَمَةٍ. لَيْتَكَ تَأْتِي وَتَضَعُ يَدَكَ عَلَيْهَا لِتُشْفَى فَتَحْيَا!».
24 فَمَضَى مَعَهُ وَتَبِعَهُ جَمْعٌ كَثِيرٌ وَكَانُوا يَزْحَمُونَهُ.
وَبَيْنَمَا هُوَ يَتَكَلَّمُ جَاءُوا مِنْ دَارِ رَئِيسِ الْمَجْمَعِ قَائِلِينَ: «ابْنَتُكَ مَاتَتْ. لِمَاذَا تُتْعِبُ الْمُعَلِّمَ بَعْدُ؟»
36 فَسَمِعَ يَسُوعُ لِوَقْتِهِ الْكَلِمَةَ الَّتِي قِيلَتْ، فَقَالَ لِرَئِيسِ الْمَجْمَعِ: «لاَ تَخَفْ! آمِنْ فَقَطْ».
37 وَلَمْ يَدَعْ أَحَدًا يَتْبَعُهُ إِلاَّ بُطْرُسَ وَيَعْقُوبَ، وَيُوحَنَّا أَخَا يَعْقُوبَ.
38 فَجَاءَ إِلَى بَيْتِ رَئِيسِ الْمَجْمَعِ وَرَأَى ضَجِيجًا. يَبْكُونَ وَيُوَلْوِلُونَ كَثِيرًا.
39 فَدَخَلَ وَقَالَ لَهُمْ: «لِمَاذَا تَضِجُّونَ وَتَبْكُونَ؟ لَمْ تَمُتِ الصَّبِيَّةُ لكِنَّهَا نَائِمَةٌ».
40 فَضَحِكُوا عَلَيْهِ. أَمَّا هُوَ فَأَخْرَجَ الْجَمِيعَ، وَأَخَذَ أَبَا الصَّبِيَّةِ وَأُمَّهَا وَالَّذِينَ مَعَهُ وَدَخَلَ حَيْثُ كَانَتِ الصَّبِيَّةُ مُضْطَجِعَةً،
41 وَأَمْسَكَ بِيَدِ الصَّبِيَّةِ وَقَالَ لَهَا: «طَلِيثَا، قُومِي!». الَّذِي تَفْسِيرُهُ: يَا صَبِيَّةُ، لَكِ أَقُولُ: قُومِي!
42 وَلِلْوَقْتِ قَامَتِ الصَّبِيَّةُ وَمَشَتْ، لأَنَّهَا كَانَتِ ابْنَةَ اثْنَتَيْ عَشْرَةَ سَنَةً. فَبُهِتُوا بَهَتًا عَظِيمًا.
43 فَأَوْصَاهُمْ كَثِيرًا أَنْ لاَ يَعْلَمَ أَحَدٌ بِذلِكَ. وَقَالَ أَنْ تُعْطَى لِتَأْكُلَ.


إقامة ابنة يايرس معروفة بس تعالوا نبحر الي العمق ..
اكيد يايرس دخل في صراع نفسي أنه يسبب بنته في حالتها و لا يروح للمسيح بنفسه ..
وَطَلَبَ إِلَيْهِ كَثِيرًا قَائِلاً: «ابْنَتِي الصَّغِيرَةُ عَلَى آخِرِ نَسَمَةٍ. لَيْتَكَ تَأْتِي وَتَضَعُ يَدَكَ عَلَيْهَا لِتُشْفَى فَتَحْيَا!».
حالة حرجة .. نفسي بتضيع..اللي لسه متعلمة الطريق الروحي وقعت في خطية عظيمة و بقيت في اخر نسمة ... بيتي يارب في اخر نسمة أسرة مكسورة و كل واحد في وادي ..اخر نسمة ...بنتي و ابني بيروحوا مني مسروقين في سكة هلاك و اصحابهم مضيعينهم..اخر نسمة ..معدش يحبني زي الاول شغله و خروجاته و ليه علاقة بغيري و علاقتي بيه بتنهار..اخر نسمة ...شغلي بيتدمر ..ديون و غلاء و مش قادر ..اخر نسمة ..انا في حكم الموت شكلي عايش بس جوايا ميت ..اخر نسمة ...فشلت و الفرصة دى اخر نسمة ...الحل ... اجري و اترمي عند أقدام المخلص و ما تقعدش تندب و تنتحب .. اطلب أن يضع يده لتشفي..صلي سيب دموعك تحررك من خوفك ...حيسمع و ينصت و يشفق و يأتي ...اه جميل نقول لبعض صلي لي لكن من باب أولي اصلي انا ..احكي انا ...انا اقدر واحد يشرح مشكلته و ألمه و اللي مش حعرف احكيه حيحسني و يشعر بتنهداتي ..
مش ممكن تروح للمسيح بمصيبتك وورطتك و يتخلي خصوصا لو كان ليك ايمان ..الايمان عامل زي الدلو اللي تخرج بيه مية الحياة من ينبوع الحياة الذي لا يفرغ و لا يشقق..
طب ليه يسوع ما قلش كلمة فتبرأ البنت زي ما عملت قبل كده ...غالبا لأنه عرف انها ماتت بعد خروج إليها و مع هذا لن يرده .فارغا.. الوحيد اللي مش ممكن يقولك جملة جاي لي بعد ايه بعد ما خربت مالطة ؟! .تخرب الدنيا مش مهم هو وحده يبنيها تاني ..ليه طرق خلاص و نجاة لا تخطر علي قلب بشر ..
اكيد يايرس كانت نفسيته بتتحطم و هو شايف المسيح بيمشى ببطء علشان الزحام و زاد و غطي كمان شفاء نازفة الدم ووقوف المسيح ...يارب بسرعة ...يارب مش حستحمل كده ..البنت بتموت ...الحل كان في الكلمة اللي قالهاله في الاول ...لا تخف ...أمن فقط ...و الزحام ده يقولك أن الإنسان ما يفكرش غير في نفسه ..يمكن الأنانية في طلب الأبدية حاجة حلوة بس الزحمة علشان كل واحد عاوز يشفي و مش مهم اخوه ...
الصدمة ....ساعات تدخل ربنا في احتياج و موضوع و تلاقيها باظت و انقلبت اكتر ..ابنتك ماتت ...يالها من صدمة ... و قبل ما يشعر بندم أنه تذلل ليسوع أو يشمت فيه الفريسين اللي كانوا في أشد الغيظ أن يسجد رئيس مجمع أمام هذا الفقير ..عاجله بسند يحسن يخور.. لا تخف ..أمن فقط ...بس دي ماتت ..انا سقطت بالفعل في الخطية ما بقتش فكرة ..دي مراتي سابت البيت ..ده جوزي انفصل عني..ده انا اترفدت ...ده انا افتقرت و خسرت كل اللي معايا ..ده ابني بقي مدمن ..دي بنتي فقدت نفسها .. انا ضعت ...لا تخف ..أمن فقط ...اامن ازاي بس بقولك ماتت ...معلش هو مانح الحياة ..زمان اول ما ابويا مات ساب لنا ورشة و كانت مديونة و كان فيه حاجة اسمها ضريبة تركات طلبت ساعتها مننا ٣٠٠ الف ج في ١٩٨٥ و اصلا الورشة باللي فيها ما تجبش ٣٠ الف و ساعتها كنت في كنيسة الأنبا شنودة رئيس المتوحدين و بداية معرفتي بابونا بطرس ...شكيت له و قلت له يصلي لي قالي روح علي أيقونة الأنبا شنودة و هو حيعمل معاك شغل جامد ...رحت و صليت بيتنا حيتخرب حنضيع ..يومين و زادت الطينة بلة اتبعت التقدير بنموذج ١٨ و ده تقدير أولي بس لازم تطعن عليه.. طعنا و رحت تاني قالي ما تخفش ...صلي صليت ..شهر و جه نموذج ١٩ و ده ربط نهائي بنفس الرقم ٣٠٠ الف ج ...ما فيش حل غير المحكمة و دي اخر حاجة نلجأ لها و جري العرف أنه باقصي خيال يعني ممكن يدفعونا النص يعني ١٥٠ الف ..مصيبة ..خراب ..رحت اعاتب الأنبا شنودة و أقوله اجيلك بدل ما تحلها تقفلها و تخربها...و قبل النطق بالحكم يطلع قانون اعفاء من ضريبة التركات و يحدد حاجة اسمها رسم ايلولة و نستفيد من هذا القانون لأنه ما صدرش حكم لسه و مش بس كده لان المأمورية قدرت رسمي الورشة فالرسوم تتحسب علي تقدير المأمورية و دفعنا ٣٠٠ ج بس !!!!!!!! لو كان القانون طلع و احنا لسه ما وصلتناش النماذج كان ممكن المأمورية تغالي في التقدير فندفع رسوم ايلولة توصل ٣٠ الف بس ربنا عمل كده بشكل انها خربت ...ماتت ..لكن في أيده حياة ..دفعنا ٣٠٠ ج بس ...من ساعتها انا مرتبط بالكنيسة دي و ابونا بطرس لحد النهاردة و بصلي اسبوع الالام هناك ..
ساعات نسمع كلمة ربنا و تاخدها بسخرية تضحك و كان المشكلة أعظم منه ..هو ابونا ده ما فيش في بقه غير صلي ..ما فيش حلول عملية ؟! .. زي ما عمل اللي كانوا بيعزوا و يندبوا و خصوصا دي صبية يعني حاجة تقطع القلب ..دخل يسوع و معاه الناس بس اللي يستاهلوا يعاينوا قوة لاهوته و مجده ..
مسك بايد الصبية ..نقل من حياته لموتها.. يا صبية قومي ..طالما ما قلش اسمها حط اسمك و حطي اسمك ..يا نبيل قوم يا ماريا قومي يا امل قومي يا سارة قومي يا اي حد قوم ...المسيح يمد أيده ليك و بيقولك قوم ..انفض الموت عنك و قوم ..انفض الياس و الكآبة و قوم ..انفض الفشل و قوم ..و يقول ادوها تاكل ....الميت في خطيته و زناه و شهواته زي حالاتي لما ربنا يعيده الحياة تاني بكلمته و يقوم لازم ياكل علشان تفضل الحياة فيه ...كل جسده و اشرب دمه تحيا فيه و هو فيك ..كلمة ربنا تتاكل ما تتقريش يقول ليوحنا في الرؤيا خد السفر و كله مش اقراه ...اللي تكتب له حياة من جديد لازم يتغذي و ياكل ..
محصلة النهاردة
..أمن فقط ...لا تخف ..لم تمت .. امسك بيد الصبية ..لك اقول قومي ..للوقت قامت ..مشيت ..لتأكل
لالهنا كل المجد


نبيل شحاتة

[Mary Naeem]

..أمن فقط ...لا تخف ..لم تمت .. امسك بيد الصبية ..لك اقول قومي ..للوقت قامت ..مشيت ..لتأكل
لالهنا كل المجد