حقك علينا

[walaa farouk]

يعنى ايه ..
فى عز الشتا ..
كل اللى يستر جسمك ..
حتة قماش ..

يعنى ايه ..
وانت حتة لحمة حمرا ..
ماتلاقيش حاجة غير القش ..
تنام عليها ..

يعنى ايه ..
بدل ما تلاقى القطن والحرير ..
ياخدوك فى حضنهم ..
تلاقى التبن عمال يشكشك فيك ..
من كل ناحية ..

يعنى ايه ..
أول هوا تتنفسه ..
يكون مليان روايح حيوانات ..

يعنى ايه ..
بدل ما مليون ايدك تشيلك وتطبطب عليك ..
تترمى لوحدك فى صندوق تبن ..

يعنى ايه .. ويعنى ايه .. ويعنى ايه ..

اقولك على حاجة ..
انا عارف انك عملت كل ده ..
عشان تعلمنا حاجات كتير ..

بس للأسف ..

سدينا وداننا ..
وغمضنا عينينا ..
وكل واحد دور على اللى يريحه ..
وغرقنا نفسنا فى بحر طقوس وعادات ..
وكتفنا نفسنا .. اننا نعمل ولو حاجة واحدة ليك ..

وكأن يوم ميلادك ..
مناسبة اجتماعية ..
عشان نسلم على بعض ..
ونخرج مع بعض ..

ورغم ان انت صاحب العيد ..
بس انت اخر واحد فى حسابات ناس كتير ..

اعتقد جه الوقت ..
عشان نقول لك ..

حقك علينا ..

وانا عارف ان بالك طويل علينا ..
ومستنى اليوم اللى هنقدر فيه ..
نطلع من بحر الطقوس العائلية ..
والعادات الاجتماعية ..
ساعتها انت هتفك التكتيفة اللى احنا فيها ..

وهيبقى يوم ميلادك ..

هو اليوم اللى بنجيلك فيه ..
مع بعض ..
مش اليوم اللى بنسيبك فيه ..
عشان نخرج مع بعض ..

على فكرة ..
لسة فيه وقت ..
نفكر ازاى نغير ..
اللى متعودين نعمله بقالنا سنين ..
حياتنا مش هتتقلب ..
لو عملنا كدة ..
بالعكس ..
حياتنا هتتعدل ..

عشان هتمشى وفق ..

الطريق والحق والحياة