لسه سنجل بعد الخطوبه .

[Rena Jesus]

لسه سنجل بعد الخطوبه .

لاااا ،، لو دي الخطوبه اللي كنت عايشه طول عمري مستنياها يبقي بلاها ،
الاستاذ خطبني شهر اهتمام ورومانسيه وبعد كده تحول لكائن تقليدي ممل ،
مانكرش انه مجتهد ومحترم وحنين وشاري ، لكن ، يادوب مكالمه ولا اتنين ف اليوم كبيرهم نص ساعه ،
زياره ولا اتنين ف الاسبوع ، ينزل من غير ما يقولي كان فين ولا رجع امتي ولايرجع يحكيلي عمل ايه طول اليوم ،
بيرجع من الشغل تعبان مكالمه وينام ، لايسأل نزلتي امتي ولا جيتي امتي ،
عادي جدا الاقيه علي الواتساب او الفايسبوك لواحده ، لو لبست حاجه جديده علشانه ولا ياخد باله !!!
لااا انا محتاجه واحد يعيشني بكل تفاصيلي واعيشه بكل تفاصيله ، واحد مشغول بيا وفاكرني طول اليوم ،
وبعدين لما احنا دلوقتي كده ، امال بعد الجواز هانبقي ازاي !!
انا فعلا حاسه اني لسه سنجل ، بس ايه اللي يجبرني علي كده ،؟؟؟؟؟؟؟؟؟


الرد:
هو ده بعينه المرض اللي معظمكم كبنات عايشينه ، مفهوم عقيم زرعوه فيكم من طفولتكم ( الراجل كل حياتك )!!

والنتيجه :

عنوسه 50 %علشان البنت مصممه تلاقي الفارس الوهمي ،
و50% طلاق علشان الزوجه اكتشفت انه مش الكائن الوهمي ،

والحقيقه انه عمره ماكان ولا هايكون الكائن الوهمي اللي بتحلمي بيه ، لانه ببساطه متبرمج بطريقه مختلفه عنك ،
متبرمج علي تحقيق الاحلام وتحمل المسئوليات وبتحركه الاحتياجات مش المشاعر زي حضرتك ،
حتي لو كان بيمثل ف بدايه العلاقه انه رومانسي وهاريكي كلام حب عكس طبيعته العمليه
( وطبعا الاستثناء موجود لكن قليل ) بس في المجمل اللي بتحلمي بيه بالنسبه له اسمه ( خنقه )
علشان كده اكتبو ورايا قبل مأموت مشلول :

1- للمرأه عالم خاص ومكتمل بدون الرجل ،عباره عن دراسه احلام دين اصدقاء عيله ثقافه حريه افكار سرقه بالاكراه ،
هذا للعالم ليس للرجل وجود فيه ( لا الزوج ولا الخطيب ولا الحبيب )
الا مجرد زائر لحد ما طرف من الاتنين يغور في داهيه بعد الشر ويموت ،

2-وللراجل نفس العالم بنفس التفاصيل ، وليس للمراه اي مكان (لا الحبيبه ولا الزوجه ولا الصديقه) ،
مجرد زائره خفيفه تلقي التحيه وتختفي في اي مصيبه .

3- العالم المشترك ؛
هو ده اللي من حقك تتكلمي عليه وتلاقي فيه كل احلامك معاه ، عالم خاص بيكم لوحدكم ،
مش من حق حد يقتحمه لافايسبوك ولا واتساب ولا موبيلات ولا اصدقاء ولا اهل ولا حتي اولاد ،
الهيام والرغي والود ، ولو متجوزين تبقي الرغبه كمان ضمنهم ،

بس افهمو .... العالم ده مجرد ساعات واحيانا دقايق ، ووارد يزيد في الرحلات والاجازات ويبقي ايام ،
العبقريه بقي ان كل واحد يحتفظ بعالمه الخاص بدون ما يدوب في عالم الآخر ولا يطلب منه يدوب في عالمه ،

اولا علشان ما نتخنقش من بعض ،

ثانيا علشان لو العالم ده اختفي بالفتور او الملل او باختفاء الآخر ( اتجوز - خلع - مات )
نبقي لسه عايشين عالمنا مش نقرر الانتحار .

( بالنسبه بقي للاخت اللي بعتالي مشكلتها،،
ف لااااازم تزعلي او تسيبي خطيبك في حالتين بس ،
- لما مايكونش بينكم العالم المشترك التالت ده حتي ولو دقايق ،
-او مش بستمتعوا مع بعض جواه .

منقول

[sama smsma]

موضوع مهم جدا فعلا

[walaa farouk]

موضوع جميل اوى يا رينا

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى