لعنة الأرز تصل إلى «طبق الكشرى»

[Mary Naeem]

لعنة الأرز تصل إلى «طبق الكشرى»

قبل أن تشتعل أزمة الأرز كان الكشرى هو وجبة الفقراء، يسدون جوعهم بطبق لا يتجاوز ثمنه بضعة جنيهات، ولكن بعد أزمة ارتفاع الأسعار عامة والأرز خاصة، طال الغلاء وجبة الفقراء ووصل طبق الكشرى فى بعض المحال إلى 15 جنيهاً ولا عزاء للفقراء ومحدودى الدخل.

معادلة صعبة يفكر فيها «مجدى عبدالتواب»، صاحب أحد محال الكشرى، فالأسعار المرتفعة تجبره على رفع الأسعار أو على الأقل تقليل الكمية وفى الوقت نفسه يرى أن كلا الحلين معناه «تطفيش الزبون»، فيقول لنفسه: «الناس هتلاقيها منين ولا منين؟».
بلهجة غاضبة عبر «مجدى»، عما يحدث من انفلات فى الأسواق يدفع ثمنه الباعة والمواطنين على حد سواء: «هو الرز بس اللى غلى، ده الزيت والعدس كمان غليوا مفيش غير المكرونة اللى أسعارها ثابتة وأنا مش هحط للزبون طبق مفهوش غير مكرونة لأنه مش هيجيلى تانى». ما زال «مجدى» يفكر ولم يجد حلاً حتى الآن، لدرجة أنه يستشير العاملين معه فى المحل: «يا جماعة نرفع السعر 2 جنيه ولا نقلل كمية الرز فى كل طبق؟»، فتأتيه الإجابة النصوحة: «ارفع السعر بس استنى شوية لبعد رمضان كده كده مفيش موسم للكشرى فى رمضان».
اللهجة الغاضبة نفسها جاءت على لسان محبى الكشرى، من أصحاب بعض المحال الذين رفعوا السعر بالفعل أو قللوا الكمية للتحايل على ارتفاع الأسعار، «عمر باشا»، مواطن، اعترف بعدم وجود زيادة فى السعر، لكنه لمس صغر حجم علبة الكشرى بشكل ملحوظ: «ما بقوش يملوا العلبة زى زمان.. وفين وفين لما تلاقى شوية رز»، وهو ما يتفق عليه «أحمد حسام»: «قللوا الكمية وبيحطوا مكرونة أكتر من الرز عشان الرز غالى وهيخسرهم، ربنا يكون فى عونهم ويعدى الأزمة دى على خير»، أما «يوسف محمود»، فأكد أن بعض المحال رفعت السعر ورفعت أيضاً سعر طبق «الكمالة» من 3 جنيهات إلى 5، والسبب الأرز.
«خميس أحمد»، يعمل فى محل كشرى منذ 18 عاماً، أكد أن هناك شبه خطة من جانب أصحاب محال الكشرى لرفع الأسعار بعد شهر رمضان، بمعدل جنيه أو اثنين حسبما يتطلب الأمر فى التسعيرة الجديدة: «ما نقدرش نغلى دلوقتى، لأن الزبون أصلاً بيشتكى ومش عاجبه، رغم أنهم عارفين إن الرز غالى وفيه أزمة عند كل محلات الكشرى، لكن بعد رمضان كلهم هيحطوا تسعيرة جديدة».
ولفت «خميس» إلى أن كيس الكشرى الذى كان يباع للغلابة، اختفى تماماً: «زمان كان بيتباع لطلبة المدارس بربع وبنص جنيه، دلوقتى مفيش الكلام ده.. ده أقل طبق بـ5 جنيه».

هذا الخبر منقول من : الوطن