أسئلة صيامى

[بنتك انا]

أسئلة صيامى ؟؟؟
1- إيه هو هدفى من الصوم الكبير السنة دى؟
2- إيه هى الحاجة السلبية (عادة أو خطية أو ضعف معين) اللى لو اتغيرت فيا فى آخر الصوم؛ هاقول لنفسى أنا كدة حققت هدفى من الصوم السنة دى؟
3- وإيه هى الحاجة الإيجابية (عادة أو فضيلة) اللى لو اتضافت لشخصيتى على نهاية الصوم؛ هافرح بالصوم واحس إنى استفدت منه بجد؟
4- ليه نفسى الحاجة دى تتغير فيا (لو سلبية)؟ وليه نفسى فى الفضيلة دى بالذات؟
5- إيه هى خطة قراياتى فى الكتاب المقدس السنة دى فى الصوم الصوم الكبير؟ وإيه هى الكتب الروحية اللى لما باقراها بتنشطنى روحيا جدا ومحتاج أحطها فى خطتى فى الصوم دا؟
6- إيه مواعيد القداسات فى الكنيسة اللى تناسب مواعيدى؟ هاحضر كم قداس فى الأسبوع؟
7- إيه مواعيد القداسات فى دير.... (الدير اللى باحبه)؟ هاروحه إمتى فى الصوم السنة دى؟
8- مين الشخصيات اللى بتشجعنى على قداسات الصوم؟ ومين الشخصيات اللى أنا محتاج أشجعهم معايا؟
9- محتاج أعمل إيه تانى علشان هدفى من الصوم ما يقعش منى فى النص؟
10- هل أنا اللى عايز أصوم، ولا أنا باصوم إحراجاً من اللى حواليا؟
11- هل هاقدر أكمل الصوم كله بنفس حماس البداية دلوقتى؟ وهل هاقدر أوصل لهدفى من الصوم فى الآخر؟
12- هل أنا نجحت قبل كدة فعلا فى إنى استفيد بالصوم بجد لحياتى الروحية؟ وفرق فى محبتى لربنا فعلا؟ ولا أنا باصوم وخلاص كما لقوم عادة، علشان البيت كله بيصوم؟
13- طيب إيه الخطوات اللى أنا عارفها ومحتاج أعملها علشان أدرب نفسى أثناء الصوم على التخلص من الحاجة السلبية (اللى أنا حددتها) واكتسب الحاجة الإيجابية (اللى نفسى فيها)؟
14- حجزت ميعاد مع أب اعترافى علشان أعترف وأتوب وكمان آخد موافقته على خطة الصوم بتاعتى السنة دى؟ وأتابع معاه قانونى الروحى فى الصوم؟ وعدد الساعات الصوم الانقطاعى؟
15- إيه مقياسى أثناء الصوم، اللى هاعرف منه أنا ماشى صح ولا غلط؟
16- إيه التحديات اللى هاتواجهنى؟ إيه الحاجات اللى ممكن تعطلنى فى الصوم؟ وتنزع منى البركة بتاعته؟
17- هو أنا اختبرت قبل كدة إيد ربنا ونعمته إزاى بتشملنى وقت ضعفى وتحتوينى جدا، وتكمل جهادى فى الصوم؟ طيب هل أنا دوقت قبل كدة يعنى إيه الصوم والصلاة يخرجان الشياطين؟ هل أنا اختبرت قبل كدة إزاى الصوم بيهد كبرياء ذاتى ويورينى ضعفى فاشوف نعمة ربنا اللى دايما رافعانى؟
18- هل أنا عندى أفكار معينة بتقوللى إن الصوم ممكن يأثر سلبيا على صحتى؟ إيه ردى على الأفكار دى؟ هل الدكتور بتاعى موافقنى؟ وهل أخدت فيها قرار مع أب اعترافى ولا ماشى بدماغى؟
19- هو أنا باخسّ فى الصوم ولا باتخن زيادة؟
20- إيه هى الأكلة الصيامى اللى أنا باحبها قوى ومحتاج أتحكم السنة دى فى أكلها وكميتها أو تكرارها، علشان أتحكم فى إرادتى بجد ومابقاش متساهل مع نفسى كدة فى الخطية؟
21- هل اشتياقى للصوم كل سنة بيزيد ولا بيقل؟ يا ترى ليه؟
22- هو أنا أخدت قرار الصوم والتوبة والجهاد خلاص؟ هل حددت نقطة البداية علشان أحول قرارى لحيز التنفيذ؟
23- إزاى هاعرف فى نهاية الصوم إنى حققت هدفى السنة دى؟
لو عايز تضيف سؤال تانى؟ اكتبه فى التعليقات.. وأنا هاضيفه على الأسئلة.
برسوم القمص اسحق