✍️عوده المدارس

[walaa farouk]

+++++++++++++++

بتلاقي صور الأهالي مع ولادها في بدايه الدراسه
وابتسامه عريضه وكده
وبوست فوق الصوره
( ابني حبيبي وبنتي حبيتي وكلام جميل وكده)
ده الصبح
بليل بقي تلاقي في شباشب مرميه علي الترابيزه
تلاقي صوت عالي جايب آخر الشارع
بنلاقي ضحايا عموما 😁
وفجاءه الأم اللي كتبت ( بنتي حبيبتي )
تلاقيها بليل تقول( دي ايام سوده.. ايام ما يعلم بيها إلا ربنا )
وسط كل ده عاوز أقولكم كام حاجه
اول حاجه بلاش نستهين بالضغط
اللي بيحصل في البيت وتلاقي ناس تقول
( دي بنتك في ابتدائي مش ثانويه عامه يعني )
ممكن بعد إذن حضرتك تسكت 🤐
مدام مش حاسس اسكت
مدام مش قاعد شايل هم مذاكره وبيت وحياه اسكت
صدقني وفر كلامك انت ماتعرفش الضغط بتاع المذاكره
مش حكايه حد شاطر وحد خايب
لكن هو الولاد خلقها ضيق مش جيل بيحب يقعد في مكان ثابت
قصه كده نفسيه باقت في كل الجيل
فعملش مدام مش فاهم اسكت وماتقللش من التعب
لا تقول ده أبتدائي وتحاسسني انه كلام فاضي
انت ماتعرفش حاجه
فنصيحه اسكت 🤐😁
تاني حاجه ( التربيه الحديثه)
يطلعلك كام مصلح اجتماعي ويقول للام
( لما ابنك يستغبي ارجوكي ماتزعقيش
ويحاسسني ان هاشغل موسيقي هاديه
ولسه هاصبر أنا بقي علي ابني والجو ده )
نصيحه بردو اسكت🤐😁
جو التربيه الحديثه والعيل عمال يستغبي
وعمال يتنح علي امه😁
وعمال ينام
وعمال يمسك التليفون
وعمال يلعب في القلم
وفجاءه يعطش اكنه في صحرا ويقعد يشرب في ساعه
ويجوع وياكل في ساعه
والجو ده وبعدين تطلب من الأم تبقي هاديه
ولطيفة وتفضل توعظها عن التربيه الحديثه
وتحاسسها انها مجنونه 😁 علي ما اعتقد حضرتك بردو تسكت
الوقت ده الآم بتبقي جايبه اخرها لا هاتفكر في تربيه حديثه ولا قديمه
تقريبا بتفكر في الهروب هههه😁
طب اعمل ايه ؟
صدقيني ولا حاجه
هاقولك نصيحتي البسيطه
١. سلمي امرك لربنا 😁
ده بجد اصل مافيش حل هي سنه وهاتعدي وفيها ضحايا ههههه
٢. عودي نفسك تصلي فعلا قبل المذاكره مع ولادك
وهي الصلاه هاتمنعني اني ازعق او تخلي العيال تركز؟ الاجابه لا 😁
بس فكره ان في صلاه في الاول فكره مريحه
وتطلبي روح الله كده علشان الوقت يعدي بسلام بس
٣. تالت حاجه مهما زعقتي او الجو بقي ساحه حرب في البيت
ارجوكي اهم حاجه بس حافظي علي نفسيه ولادك
يعني عادي ازعق وأخرب الدنيا بس
ممكن بلاش اهانه وبلاش شتيمه وبلاش ضرب مُهين
اعملي اللي عاوزاه من غير اهانه
٤. لما تخلص وقت المذاكره وتقولي لعيالك
(قوموا بلا قرف أنا زهقت هههه)
اقعدوا عادي بقي يعني احضني بنتك عادي
احضني ابنك عادي هزروا سوا اتكلموا سوا اي حاجه بره الجريمه
اللي كانت من شويه 😁
ده هايفرق كتير في نفسيه ولادي اني محبوب رغم اني عيل تنح😁
واخيرا
ربنا معاكم وأيام وهاتعدي زي ما عدي سنين كتير