شكرا يا صديقي

[walaa farouk]

شكراً لكل حد قدملي حُب مش عايز من وراه حاجة..

وكل حد وقف جنبي وقت ما فقدت الأمل في الناس
، وكأنه بيقولي.. "مش كلهم وحشين".

شكراً للي شافني مكسور فا جه يشجع ويسند رغم احتياجه زيي لحد يسنده..

شكراً للي وانا معاه ببقى ببساطة "أنا" من غير وشوش ودفاعات وتجميل..

شكراً للي كان امين قدامي ومع الناس من ورايا يحفظ غيبتي، وكأنه بيقولي "تستاهل حد يدافع عنك حتى وانت مش موجود".

شكراً للي كلامه عجز عن مساعدتي فا جري على اوضته يركع ويصلي عشاني أن الله يتدخل وينتشلني..

شكراً وشكراً يا صديقي، يا سبب سندتي وتكملتي.. يا صوت الله الجميل ليا لما اسودت الدنيا في عيني وفقدت الامل وقت طويل..

مش عارف من غير وجودك.. من غير حُبك النقي وسندتك ليا كنت هكمّل ازاي لغاية دلوقتي؟ ..