قولوا لكنيستي

[walaa farouk]

قولوا لكنيستي

قولوا لها انها وحشتني، قوي قوي ..

قولوا لكل طوبة فيها اني نفسي اقبلها ..

قولوا للدكك اني نفسي اقعد عليها و لو لحظة، و اطمن عليها ..

قولوا لحيطانها و عواميدها و ترابها انهم غاليين علي قوي ..

قولوا للمذبح اني نفسي اقبله.. قولوا له نفسي اتناول تاني

، و اني عرفت غلاوته عندي و ما عدتش استهتر تاني بيه...

قولوا للتونية اني نفسي البسها و لو ثانية و ح اقلعها ،
صدقني مش ح أطول ، هي لحظة و بس اخش حتي أحضنها و اطلع ..

مشتاق أن شالله اروح الم شوية تراب من علي بابك يا كنيستي ..

قولوا لها اني باحوش دموعي في كأس التوبة و الندم و الالم ، و جايبهولك مليان و فايض..

صدقيني عرفت قيمتك و عمري ما ح ازعلك تاني ..

قولوا لها أن القداس كله وحشني ، بالحانه و قراياته ،

و شمامسته و كل حته فيه .. الشمع المنور مستني اشوفه ، و البخور عاوز احضنه ،

و ستر الهيكل نفسي اسجد عنده و اقبله ..

قولوا لها ان قلبي موجوع ، و اني عمري ما اسيبك تزعلي مني تاني ..
ح اقف فيكي بتواضع و أدب و خشوع ..

بس ما تقفليش بابك في وشي .. كله الا زعلك ، يا دنيتي و ابويا و امي و كل عمري ..

قولوا لها اوعي العيد يجي و انا مش جواكي ، طيب اعمل ايه و اقول يا مين و اتحامي في مين ؟؟

اوعي قلبك يقفل مني و تحكمي علي أن غيابك يطول ..

يا تري ح تقولولها؟؟

و يا تري يا كنيستي، حبيبتي، شايفاني لسه ما استهلش حتي تسمعيني

و لا ح تحني و تردي علي و تسامحيني ؟؟