حساس أفندي

[walaa farouk]

طيب جدا و حنين بزيادة ، و مشاعره سابقاه علي طول ..
بيكتم كل اللي حاسه بين ضلوعه ، خايف حتي يقول اللي مضايقه ليضايق حد معاه و يتقل عليه ..
بييجي علي نفسه بزيادة، و عمره ما يطلب حاجة من حد الا بصعوبة شديدة،
و كمان عمره ما يرفض لحد طلب حتي لو علي حساب راحته ، أصل وشه "ضيق " ..

عمر ما فكره بيرتاح من كتر ما بيعيد و يزيد اللي مضايقه من نفسه و من غيره جوه عقله ..

حساس "أفندي" زعله زيادة، ما بيعرفش يفوت لا لنفسه و لا لغيره..
عامل زي اللي "بيقشر بصل" ، كل ما يشيل حتة منها يعيط جنبها !!
طول النهار يا متضايق من نفسه و عنده شعور بالذنب أنه مقصر
، يا إما زعلان من "حد" و قاعد يعاتبه في مخه بعد ما عاتبه في وشه..

صاحبنا الحساس أصحابه قليلين قوي ، لأن ما حدش فاهمه،
كل اللي بيقرب منه مش عارف يرضيه، أصله "قماص" و "زعّال" علي طول ..

حساس أفندي لا مرتاح و لا مريح اللي حواليه..
عايش في دنيا ضيقة عاملها لنفسه و مش عاوز يطلع منها ..

يا صديقي الحساس : كفاياك حسابات و مراجعات و عتابات
.. فوت لنفسك و لغيرك، و خللي مشاعرك بيضا.
. كفاياك زعل الدنيا مش مستاهلة، و خليك بسيط: ازعل من نفسك
و بعدين صالحها علي طول، عاتب الناس و اصفي علي طول
، قول اللي جواك و ارتاح علي طول..