[Mary Naeem]

ماذا ينتفع الأنسان لو ربح العالم كله وخسر نفسه؟



من أمبارح والدنيا كلها بتتكلم عن وفاة الفنان العالمي عمر الشريف .. الكل حزين وهو بيتابع الأخبار وهي بتعرض مشاهد من افلامه واحاديث من أصدقاؤه وأحباؤه الكثيرين وتذكر أعماله ومواقف كتير من حياته .. كان نجم لامع في سماء المجد لفترة زمنية طويلة بس توقفت عند جملة ألمتني جداً .. ال BBC قالت إنه توقف عن قبول أفلام لإنه “فقد احترامه لنفسه وكرامته”

In the late 1990s Sharif began declining film offers, claiming he had lost his “self-respect and dignity”.

وواضح إنه كان غني جداً للدرجة إنه يذكر في مرة فقد ٧٥٠٠٠٠ جنيه إسترليني في لعبة ..

وتأثرت قوي لما سمعت انه كان بقاله ٣ ايام متوقف عن الأكل وإن ابنه الوحيد كان مسافر وقت وفاته وماكانش جنبه .. واتمنيت من قلبي إنه يكون تقابل مع رب الحياة قبل الوفاة ..

وانا باقرأ الأخبار دي وقفت عند قصة تانية مشابهة لسيدة غنية جداً كانت على الباخرة التيتانيك اللي بالرغم من شهرتها الفائقة غرقت وأغرقت معاها ناس كتير ماكانش ليهم مكان على قوارب النجاة .. الست دي، اللي بسبب غناها لقيت مكان، صرخت قبل إنزال القارب وطلبت انهم يعطوها فرصة تروح الكابينة بتاعتها .. ولما أعطوها فرصة ٣ دقايق، جريت في وسط الخطر الرهيب ده ووصلت غرفتها، وأغرب حاجة حصلت .. بصيت لقيت كل الفلوس والمجوهرات على الأرض، لكن ماخدتش لحظة تفكر .. سابت كل ده وأخذت “برتقالتين” .. النجاة ووجود أكل معاها كانوا اهم بكتير من كل حاجة في الدنيا ..

حقيقي .. “ماذا ينتفع الانسان لو ربح العالم كله وخسر نفسه؟؟ او ماذا يعطي الانسان فداء عن نفسه؟؟” متى ١٦: ٢٦.. لو جت على الحياة الأرضية وبس، أهي كلها مساعي علشان حياة أفضل بس السؤال بيطرح نفسه “ماذا أعمل لكي أرث الحياة الأبدية؟” مرقس ١٠: ١٧.. “ماذا يعطي الإنسان فداء عن نفسه؟” ..

منقول