[Mary Naeem]

«أحمد» يواجه كتابات الإخوان »

الوطن يجمع تبرعات من الأهالى لشراء دهانات

«هفضل أدهن الحيطة لحد ما ينتهى تلوث الإخوان»، قرار مواجهة اتخذه «أحمد» بتخصيص ساعتين من يومه، لإزالة شتائم الإخوان وشعاراتهم على جدران وأعمدة إنارة شوارع منطقته بالمهندسين، ليحاربهم بنفس الوسيلة، لكن الفرق الوحيد أنه يعيد جمال الجدران مرة أخرى.
لا يشعر الشاب العشرينى بالخوف من قراره كباقى الأهالى الذين يخشون أن يمسهم الضرر من أنصار الإخوان، «لما حاولت أجمع عدد من المنطقة يساعدنى فى إنهاء شتايم الإخوان، فى ناس كتيرة كبرت مخها وقالولى دا شغل المحافظة، وناس تانية خافت من إخوان المنطقة لا يحطوهم فى دماغهم، وشباب قليلة جداً اللى وافقت أنها تنزل معايا وتساعدنى»، مضيفاً «سكوتنا على الشتايم اللى على الحيطان وعمدان النور بتبين سلبيتنا قدام الناس وليهم، وأنا مش هديهم فرصة يكتبوا على الحيطة تانى وهفضل وراهم يكتبوا ويلوثوا وأنا أزين الحيطان بعدهم لحد ما يجيبوا آخرهم».
«فرشاة ودهانات»، أشياء بسيطة ينزل بها «أحمد» الأرزقى من بيته يومياً بملابسه البالية، «أبويا بواب فى عمارة هنا، وأنا راجل على قد حالى وعايش باليومية، بس ده مايمنعش إنى أنزل وأساعد بلدى تكون نضيفة من شتايم الإخوان»، مضيفاً «بقالى أسبوع بنزل كل يوم بالفرشة والدهان ومخصص اللون الأصفر للحيطان والأسود لعمدان النور، ومن كل شارع بعدى عليه بلم تبرعات من الأهالى عشان أقدر أشترى ألوان أدهن بيها الشارع، فيه جيران بيدونى اللى بيقدروا عليه وشباب تنزل معايا وتساعدنى ندهن الشوارع اللى باقية».