[Mary Naeem]

السيسي عن القصف الإسرائيلي على غزة

المصرى اليوم
تحدث الرئيس عبدالفتاح السيسي، عن القصف الإسرائيلي على قطاع غزة، والمبادرة المصرية التي طرحت لوقف القتال، وكذلك الهجوم على الموقف المصري بشان الأزمة، وقال: «بقولها لكل اللي بيسمعني، دلوقتي مصر قدمت 100 ألف شهيد وضعفهم مصابين، مصر قدمت على مدى تاريخ القضية، اقتصادها المنهار، على مدى 60 سنة، مش معناه خلاص كده لا والله، بفكر كل الناس بره وجوا، إحنا المصريين عملنا ايه علشان خاطر أهلنا في فلسطين».


وأضاف السيسي في كلمة له بمناسبة الذكرى الـ 62 لثورة يوليو، الأربعاء: «مفيش محفل وفرصة إلا وندافع عن القضية الفلسطينية، صعب إن حد يتصور ويتكلم ويزايد على موقفنا من فلسطين، ودور مصر، مش بس مع الأشقاء في فلسطين، دورنا كمان على الصعيد العربي».


وتابع: «مصر دولة عظيمة ومسؤولة خلوا بالكم، مش هدخل في تفاصيل في الموضوع، في كل توتر يتم بين القطاع والإسرائيليين، كنا بنتكلم بنقول بلاش».


وواصل: «الـ 3 اللي اختطفوا منذ أسابيع، وقولنا ضبط النفس بين الجانبين، وعدم خروج الوضع عن السيطرة، بنعمل اتصالات علشان ده مش يحصل، حتى المبادرة مش عايز أقول كلام مش لصالح الموقف، إحنا عايزين المواطنين البسطاء في القطاع مش يتعرضوا للقصف، عايزين نوقف الموضوع والاقتتال اللي بيروح فيه كتير من الأبرياء».


واستطرد السيسي: «المبادرة لم يوضع فيها شروط من حد، إحنا قولنا نخفف الاحتقان ونوقف إطلاق النيران، وتفتح المعابر، وتدخل المساعدات ويقعد الطرفين وكل واحد يطرح الملفات اللي عايز يتفاوض عليها، علشان نحل، أنا هقول تعقيب أخير خلاص، يا ترى الواحد بعد مرور 30 و40 سنة على إدارة أمر بشكل معين، مش يتوقف ويشوف النتائج ويقول حققنا اللي عايزينه واللا محتاجين نوقف ونراجع نفسنا».


واختتم: «هنفضل جنب الأشقاء الفلسطينيين بلا جدال، ده مسؤولية أخلاقية ووطنية، بدون مزايدة وبكل الصدق».