زيارة منزلية !!!
هدف الدرس: يسوع راح للناس اللي محتاجاه
الادوات المطلوبة : سماعة طبيب ( لو غير متواجدة ممكن صورة للسماعة )
الاية : " فلما سمع يسوع قال لهم لا يحتاج الأصحاء الى طبيب بل المرضى . فاذهبوا و تعلموا ما هو إني أريد رحمة لا ذبيحة . لأني لم آتي لأدعوا ابرارا بل خطاة إلى التوبة " ( متى 9: 12-13 )
أنا متأكد انكم كلكم شفتم السماعة دي قبل كده صح ؟ طب مين بيستخدمها ؟ برافو الدكتور شاطرين !!! من... فيكم كان عيان قبل كده ؟ و يا ترى رحت للدكتور و لا هو اللي جه ؟ أكيد رحت عيادة الدكتور. بس كان فيه وقت و حتى الان في بعض الامراض اللي العيان مش بيقدر يتحرك او يروح للدكتور العيادة الدكتور بيروح هو لبيت العيان " زيارة منزلية " و بياخد معاه شنطة صغيرة فيها الادوات اللي هيكشف بيها على العيان .
يسوع و هو على الارض كان بيعمل كده كان بيروح هو لكل عيان او تعبان او خاطى او اللي عندهم مشاكل في حياتهم
مثال لكده واحد جامع ضرايب اسمه متى – و كان الناس كلها بتكره اللي بيشتغلوا الشغلانة دي في الوقت ده انهم كانوا غالبا مش امناء – لكن يسوع راح لمتى ومتى اتغير واصبح من تلاميذ يسوع و في يوم عزم متى يسوع على العشاء عنده في البيت و كان فيه ناس من اصحاب متى الى من قبل ما يتغير جم يسمعوا تعليم يسوع . و كانوا الفريسين متضايقين ازاي يسوع بيكلم وبياكل مع ناس زي كده ؟!!!! وسالوا التلاميذ " لماذا يأكل معلمكم مع العشارين والخطاة؟ " ( متى 9: 11) .
يسوع سمعهم وجاوب وقال : " فلما سمع يسوع قال لهم لا يحتاج الأصحاء الى طبيب بل المرضى . فاذهبوا و تعلموا ما هو إني أريد رحمة لا ذبيحة . لأني لم آتي لأدعوا ابرارا بل خطاة إلى التوبة " ( متى 9: 12-13 ).
احنا اوقات كتيرة بنقعد في الكنيسة منتظرين الناس الخطاة والبعيدة عن ربنا هي اللي تيجي الكنيسة ّ!!! لازم احنا اللي اللي ناخد معانا يسوع و اخباره المفرحة ونكلمهم عنه لازم الدكتور يوصل الدوا لكل عيان " زيارة منزلية "
صلاة : يا يسوع ساعدني اقدر اوصل لكل واحد محتاجك و اوصله حبك .....آمين