[Magdy Monir]

مذكرات حصان





كان البرد شديد والليل لسه طويل .. وف قلبى صهيل مكتوم فقررت من فرشتى أقوم قلت أكتب صفحة من مذكراتى فى اغرب يوم فى حياتى وبين اليقظة والسبات , سمعت ودنى همسات !! أتاريه الفارس الهمام , أرق والطف انسان تنسى معاه الدنيا وتحس انك حاجة تانية .. تتمنى ما يسيبك لحظة .. ومعاه كل الفرحة ايه ده ؟! أومال أنا مالة ؟! وايه مشقلب كيانى وخلى الليلة دى اغرب أيام حياتى ؟
ليه حاسس انى عنده مش غالى ؟ حصان من وسط ميه وده كل مقامى مش برضه عندى حق يا شباب..دا انا كسفته فى كذا سباق هايحبنى يعنى على ايه ؟ ولا هايفضلنى عشان ايه؟
أنا مش زى اخواتى التانيين شداد ومأصليين أنا دايما عامل مشاكل .. وهو شايف وساكت أنا واثق م اللى بأقوله .. ده ف دماغى الليل بطوله لو كان الفارس بيحبنى وكنت عنده فريد .. ليه بيطلع عينى وف قسوته ساعات بيزيد ليه بالمناخس ينخسنى وبعصاية ف ايده يلسوعنى وأحس انى مجبور .. مقهور .. مفروضة عليا الأمور بس صدقوا أو ماتصدقوش .. عاوزكوا تعرفوا وماتستغربوش بالرغم من ان لجامى ف ايده .. ما هو القائد مش أنا اللى سيده الا انى باحس انى حر .. وف عنادى ممكن أصر مستحيل يحركنى بالقوة .. ف الاخر ده قرارى وطالع من جوه ده قدام أعلى الحواجز بيكون ليا حارس وبأحس بضربات قلبه .. مجهوده وتعبه وحبه مش بس كده .. الغريبة بعد كل سباق, بأحس انه بحبه ليا سباق يجرى عليا ويحضنى وف حضنه أحس ان ماحدش قدى والسكر فى بقى يأكلنى ينسينى تعبى ويسعدنى ويمشى ماسكنى بفخر واعتزاز .. بتبقى لحظة .. يااااه !! تهز مشاعرى اهتزاز الصراحة.. أنا مش فاهم حاجة !! أنا عنده ( أنا ) ولا مجرد حاجة الأعتراف بالحق فضيلة .. وأنا خايب والخيبة تقيلة نفسى أكون حصانه الخاص .. أشرفه وأرفعله الراس وف نفس الوقت متلخبط !! أزاى محبة وسياط بيضرب ؟؟؟