علماء النفس بيقولوا إن الإنسان بيكوِّن رأيه عن نفسه، من رأي أكتر حد مهم في حياته، عنه .. يعني لو أبوك أو أمك أو زوجك أو صديقك مثلا، كان أهم شخص في حياتك، رأيه فيك إنك فاشل، إنك مفيش فيك حاجة تتحب، إنك لا تساوي شيء، الفكرة دي هتكون رأيك في نفسك ..
يمكن تكون من الناس اللي ماجالهاش ورد أو هدية في عيد الحب.. يمكن تكون شاعر إنك وحيد ومالكش قيمة .. الناس كلها إحتفلت، وانت ماحدش حاسس بيك أو بيعبر لك عن حبه .. إرفع عينيك على الصليب وإنت هتشوف رأي تاني عنك .. رأي أهم شخص في الوجود .. رأي بيقول إنك لك قيمة لدرجة إن حد يموت علشانك.. هتقرأ رسالة حب حية .. حب مالهوش مثيل .. رسالة مكتوبة بدم غالي سال علشان يفديك .. علشان يهديك حياة أبدية .. بيحبك لدرجة إنه عايزك تعيش معاه مش يوم أو يومين .. سنة ولا ثمانين.. لأ، لأ.. طول الأبدية.. أيوة .. للدرجة دي إنت غالي .. للدرجة دي لك قيمة