[Mary Naeem]

النهاردة قتلوا هلال تاني !
هلال صابر شاب قبطي غلبان كان ماشي في حاله في الخصوص .. يومها في ابريل اللي فات كان فيه فتنة وقتلوا خمسة اقباط .. هلال وهو راجع من شغله عرفوا انه قبطي وكان الصليب علي ايده .. اتلموا حواليه وطعنوه بالسكاكين .. ثم احضروا موادا قابلة للاشتعال والقوها عليه واشعلوا فيه النيران وهو حي .. حرقوه حيا ، وبعد ايام قليلة استشهد هلال صابر متاثرا بطعنات جسده وحروق نسبتها 85 في المئة ..... مات هلال وساب دنيا الظلم والارهاب ..
النهاردة قتلوا هلال تاني .. وحطوا جير حي علي حروقه ..
مفيش حد اتحاكم علي قتل وحرق هلال والخمسة التانيين
كله براءة يا باشا
واللي خد حكم كان من 5 سنوات الي 6 شهور عشان حرق او تخريب ..
اما دم الاقباط فليس له ثمن في مصر
كالعادة ... لا يتم الحكم في قضايا ضحاياها اقباط
الجديد ان القاضي حكم علي قبطي بالمؤبد وعلي اخرين ب 15 سنة ... وذلك لان هناك قتيل مسلم رغم ان ليس هناك شهود اثبات وليس هناك تلبس ولا سلاح جريمة ولا حد شاف ..
ياراجل دا من ضمن المتهمين الاقباط بالقتل واحد قبطي ميت من 5 سنين .. يعني شوية عضم.. بس هي دى مصر .،
في مصر .. القبطي .. مجني عليه ومحكوم عليه.. وعندما يقتل ويحرق حيا لا يوجد متهم
معلش يا هلال حقك علينا .. دمك الطاهر شاهد علي بلد ظالمة خربانة ..ونفوس مسكونة بالكراهية