[sama smsma]

المشاركة الأصلية كتبت بواسطة ناصر أمير

معلش يا كاتى أنا مروحتش على طول بعد الشغل رحت كم مشوار كده وبعدين جيت واستريحت شوية وأكلت ودلوئتى دخلت المنتدى مع كباية قهوة علشان التركيز
وبعدين سما مش شخصية عادية فى المنتدى علشان اسأل أسئلة وخلاص..لازم أكون مستعد للمقابلة اللى هى صعب تتكرر تانى
وكمان توصيتك اللى انت قولتى عليها من عنيا
قبل ما ابتدى الأسئلة عايز اقول
يارب يارب ابعد عنى اللون الأحمر
ومتخليش سما تبعد الاجابات باللون الأحمر
وكمان تعليقات كاتى تكون بلون تانى
وحتى لو كتبوا باللون الأحمر ياريت تحصل معجزة
ولما الكلام يوصلى يكون اتغير فى الطريق
أو عوامل التعرية أثرت فيه والكلام يوصلى بلون تانى

ههههههههههههههه لا بجد ضحكتنى يا ناصر
علشان انا بحب الوان السما
مش هاكتب الا بيها بقى وكفاية احمر لغاية كدة انا جالى احولال منه هههههههههه


وأنا سعيد يا سما ان اجاباتى عجبتك
وياريت أسئلتى كمان تعجبك
وأشكرك يا اوفا انك كنت واقفة جنبى
فى التلات أيام اللى فاتوا
لما نشوف


ونبتدى الأسئلة
وهى عبارة عن أسئلة وحوارات ومناقشات فى نفس الوقت
المجموعة الأولى(16 سؤال)
النهارده
1 متى تشعر سما بالسعادة؟وما هى أحلى أوقاتك؟
بحس بالسعادة والفرح لما بشوف اللى حواليا فرحانين وانى قدرت افرحهم وارسم البسمة على وشهم وجوه قلبهم
واحلى اوقاتى لما بعمل تصميم حلو بكون عايشة الحالة فعلا ههههههه

2 حلم ما زلت تحلمى به
بحلم بالسما

3 كثير منا يفتقر الى الشعور بالسلام..فما هى الروشتة التى تقدميها لكى يعود السلام الى داخلنا؟؟؟
1 - الثقة فى ربنا وفى وعود ربنا لينا
الثقة دى بتفرح قلب ربنا اوووووووى
2 - الاتكال على ربنا فى كل شيء
لو قولنا يارب اتصرف انت وسيبت حمولك علية وعشت حياتك بفرح وواثق ان ربنا هايتصرف فعلا هاتحس بسلام رهيب بجد
3 - الصبر على ربنا شوية فى استجابته لينا لانه بيكون لية وقته اللى هايستجيب فية وحتى لو مش استجاب .. خليك واثق ان ربنا دايما بيعمل الصالح ليك وشايف احسن منك بكتييييييير
4 - حياه الفرح الدائم حتى فى اصعب الضيقات
لو عيشت حياتك فرحان وراضى بكل ضيقة او تجربة انت فيها واتعلمت تشكر ربنا عليها وانك تكون واثق ان ربنا مش هايضرك ابدا وان ليه حكته فى كل حاجة بتحصلك وانه دايما بيبقى عايز ليك الاصلح .. هاتحس بالسلام جوة قلبك
5 - دايما بص لحال غيرك واشكر ربنا على اللى اداهولك حتى
لو عندك مشكلة كبيرة او مرض معين قول ان دة من عطية ربنا ليا علشان ابقى انقى واحسن فى عين ربنا
6 - ودايما خليك فاكر ان حياتنا على الارض دى وقتية وانها ايام بنقضيها على الارض وان ربنا وعدنا اننا هانتعب اوى فى حياتنا لكن فى الاخر هانفرح فى الابدية معاه


4 مين شفيعك؟ومين شفيعتك؟
البابا كيرلس شفيعى وابويا اللى دايما بيسمعنى وبيرد عليا فعلا لو طلبته
فى كتير من المواقف بيرد عليا بطريقه رهيبة
و شفيعتى هى امى العذراء مريم

5 فى تاريخ سينما الأفلام الدينية العالمية هناك أفلام خالدة مازالت تفتكرها الأجيال ومنها على سبيل المثال(بن هور.والذى فاز ب11 جائزة أوسكار-الرداء-باراباس-شمشون ودليلة-الوصايا العشر-موسى-كوفاديس-الانجيل-مارسلينو-ملك الملوك(اخراج سيسيل دى ميل)...ما هو الفيلم العالمى الدينى(أجنبى)الذى شاهديه وأثر فيك تأثيرا كبيرا؟
كل الافلام دى اثرت فيا جدا واتعلمت منها كتير وحسيت أد اية ربنا بيحبنا وبذل نفسه من اجلنا
بس فيلم مارسلينو اثر فيا بطريقة كبيرة
وحسيت انى لازم اعيش حياتى دايما بقلب طفلة
لان الاطفال بيكونوا قريبين من ربنا اكتر وبيبقوا تلقائيين فى كل حاجة فى علاقتهم مع ربنا


6 هل تشاهدين القنوات الدينية المسيحية؟وايه القناة اللى بتعجبك؟
مارمرقس وسي تى فى
بس مش بحب برامج الاخبار اللى بتيجى على القنوات الدينية ومش بحب اتفرج عليها

7 هناك بعض الكلمات وياريت تعريف ليها من وجهة نظرك
الحرية
الحرية مطلوبة لكن بحدود
وفـ اطار اللى يليق باولاد ربنا
لاننا بنمثل صورة ربنا قدام الناس

الفضيلة
هى البر والنقاوة وهى القوة في النفس اللى بنتصر بيها على كل الشرور

المال
مايكونش اهتمامنا بالمال كبير لان هو اصل كل الشرور
المفروض يكون وسيلة مش غاية

الحياة
يسوع هو الحياه وبدون ربنا يسوع المسيح فى حياتنا نبقى ميتين واحنا عايشين

الابتسامة
الابتسامه قوة داخلية فى قلبنا من نعمة و فرح وسلام بتظهر على وشنا وبتدل على شكرنا لربنا طول الوقت
والابتسامه هى الوردة اللى بنقدمها لأى حد كهدية حلوة بنرسمها على وجهنا و بنرسمها فـى قلبهم هم كمان

الربيع
فصل الجمال والتأمل فى الطبيعة الجميله

8 ماذا يعنى بالنسبة ليك منتدى الفرح المسيحى؟
بيتى التانى اللى بحس فيه فعلا بالفرح وانا معاكم هنا

9 كيف عرفت منتدى الفرح المسيحى؟
كنت لسة جايبة الكمبيوتر جديد وماعرفش غير الفيس اللى اشتركت فيه علشان الصفحات الدينية الحلوة اللى شوفتها عند اختى
وبعد فترة قصيرة لقيت رامز بعتلى لينك المنتدى على الفيس
كان لسة عامله جديد
ودخلت سجلت فيه ومن وقتها وانا هناااااااااا


10 لماذا ينتهى الحب الأول بالفشل؟وهل هو وهم؟
قال احسان عبد القدوس عبارته الشهيرة فى بداية الفيلم الخالد(الوسادة الخالية)..قال احسانفى حياة كل منا وهم كبير اسمه الحب الأول لا تصدق هذا الوهم فان حبك الأول هو حبك الأخير)..هل انت مع رأى الكاتب الكبير؟ولماذا نتعذب وتنتهى كل الحواديت بالفراق؟..هل انت مع رأى الكاتب الكبير أم لك رأى آخر؟

شكل الراجل دة فاهم اوى ههههههههههههههه
مش فى كل الاوقات بيكون الحب الاول وهم
هو ممكن يكون وهم لما بيكون تسرع فى المشاعر او اعجاب او تعود وبنحسبه حب
ولما بيكون جة فى وقت بدرى شوية
او وقت مش مناسب ان الحب دة ينمو فيه
لن المشاعر بتتغير كل ما العمر بيكون اكبر وانضج
اوقات بيكون الولد بيدرس فى الجامعه ومش مستعد خالص لاى مسئولية او بيكون لسة بيشتغل و لسة مش كون نفسه
فبيظلم نفسه وبيظلم البنت اللى حبها معاه
لكن دة بيكون غصب عنهم انهم حبوا بعض وبالتالى بيفترقوا
لان صعب اوى ان اى انسان يعيش من غير ما يحب او يحس بحب الاخر ليه
ظروف مجتمعنا كمان اللى بتتحكم فى اى علاقة تفشل او تستمر





11 لو انت مدرسة فى مدرسة بنات ودخلت احدى الفصول فى جدولك والفصل ده كان من ضمن طالباته(...مارى نعيم-مارينا جريس-مارينا مرمر-رونيا-كاتى-اوفا-ماريا-فرونكا-ميرو-شيرين عزيز-ناردين-بنتك انا-بنتك يايسوع-رينا-مرمورة الأمورة-آمال نبيل-نونا-فيرجين-كريستينا)وكان فى فوضى فى الفصل-تفتكرى مين فيهم سواء طالبة أو اكتر تكونى مركزة عليها ان هى متزعمة الفوضى
ههههههههه بص هما لو كل واحدة قعدت لوحدها هاتلاقيهم هاديين جدا
لكن هنا اللى هاتكون دماغهم ضاربة هى فرونكا وبنتك يا يسوع ومرمورة الامورة برضه

وفى نفس الوقت أيضا مين هى الطالبة اللى انت حاسة انها هادية جدا وملهاش دعوة بالكلام ده وهاتكون واقفة جنبك؟
ماااااااااارى نعيم هايسمعولها
لانى انا لو وقفت قدامهم هافضل اضحك للصبح مش هاعرف اسكتهم هههههههههههههههههههههههههههههههه

-وتخيل تانى أيضا نفس الكلام لكن لو انت فى مدرسة أولاد والفصل به(...رامز-مجدى منير-جرجس-مايكل-هانى مشيل-فيمون-بيدو-تيتو-كوجى-ابرام...)-من هو متزعم الفوضى.ومن هو الهادى؟
متزعم الفوضى هنا هايكون هانى مع مايكل وكوجى
واللى هايكون هادى هو بيدو وتيتو وفيمون انشاء الله يعنى هههههههههه


12 ما هو أبرز موقف أحسست فيه بيد الرب معك؟
دايما حاسة بايد ربنا فى كل حاجة تخصنى
لانى اتعودت اسيب كل حاجة فى ايد ربنا
علشان كدة تلاقينى علطول مبتسمة حتى لو وسط الالم اللى عندى

13 ما هو آخر كتاب قرأتيه؟
كتاب اب اعترافى اداهولى عن محاسبة النفس

14 ماذا تقولى لمصر فى الظروف الراهنة؟
ربنا شايف وعارف اللى بيحصلك وكله للخير يا مصر واصبرى واستحملى شوية لاننا هانشوف فيكى عجائب كثيرة قريب جدا من رب المجد


15 الشهيد يرى فيه الناس صورة المسيح والشهداء قدموا حياتهم من أجل فادينا الحبيب...هل الخدمة نوع من أنواع الشهادة؟
الخدمة هى انك تتعب نفسك من اجل خدمه غيرك بمحبة وفرح وعدم انانية وكبرياء
والخدمة فى الخفاء اهم واروع عند ربنا من الخدمة اللى فيها تباهى قدام الناس
والخادم لازم يكون على صورة المسيح اللى دايما كان يجول يصنع خيرا فى كل مكان يروحه بمحبه


16 ايه هى الأكلات المفضلة عندك؟والأكلات اللى مش بتحبيها؟
المكرونة البشاميل والفراخ المشوية فى الفرن والحمام المحشى بحبهم جدا
ومدمنة شيكولاااااااااااااااته
وبحب كل الاكلات والكوسة كمان هههههههههههههه
اللى مش بحبه هو الفريك
اى حاجة محشية فريك مش بحبها
لو محشية رز يبقى فل اووووووووى
وعموما ماليش فى الحلويات اوى بس باكلها
لانى بحب الحوادق اكترررررررررررر


وكمان ايه هى الفواكهه اللى بتحبيها؟والفواكهه اللى مش بتحبيها؟
بحب التفاح جدا والموز والفراولة والمانجو والبطييييخ والكنتالوب
مش بحب الجوافة وهى صحيحة
يعنى لو معمولة عصير احبها جدا

نكتفى اليوم بالمجموعة دى
وباذن الله بكرة المجموعة التانية

ههههههههههههه شكرا يا ناصر على الاسئلة الحلوة دى كلها
يارب اكون قدرت اجاوب كويس
بس انا قولت كل اللى جوايا فعلا
وكاتبالك اهو الاجابات باللون الازرق مش الاحمر
يعنى رفقا بيا رفقا
هههههههههههههههه
لا براحتك خالص انشالله تجيبلى كل اسئلة الدنيا هاجاوب عليها