[Mary Naeem]

في إحدى القداسات التي تلت إنفجار كنيسة القديسين بسيدي بشر كنت حاضر القداس التاني بكنيسة مارجرجس بإسبورتنج و كان أبونا الحبيب القمص تادرس يعقوب هو اللي بيصلي القداس بمعاونة الآباء الكهنة...
و في عظة هذا القداس قال بالحرف: الأجيال اللي جاية هتحسد الجيل القبطي اللي عاش في العصر ده!!!
وقتها إستغربت لأننا كنا مصدومين جداً و مفهمتش الجملة دي....
و قلت : عادي لأنه أب روحاني جميل بيشوف بروح الإيمان اللي بيحصل و بيفسره بشكل روحاني....
لكن يوم بعد يوم بتأكد إنه الأجيال اللي جاية فعلاً هتحسدنا على إننا عشنا في العصر ده و الأحداث دي....
و أنا صغير كنت باقول - واثق إنه كتير منكم زيِّ - يا ريتني كنت عايش أيام الرب يسوع و شفت معجزاته و إيديه الشاف...يه المقيمة من الأموات... يا ريتني كنت طفل كان رفعني و شالني و ضمني لحضنه...
يا ريتني كنت عايش أيام الشهداء و القديسين و شفت مارمينا و مارجرجس و الأنبا أنطونيوس و لمستهم و إتعلمت منهم....
حبيبي القبطي... إنت عايش في عصر القديسين برضه....
بكره -بكره القريب أو البعيد- أبونا هيقرا في السنكسار الأحداث اليومية اللي إنت بتعيشها دلوقت
أَخِيرًا أَيُّهَا الإِخْوَةُ افْرَحُوا. اِكْمَلُوا. تَعَزَّوْا. اِهْتَمُّوا اهْتِمَامًا وَاحِدًا. عِيشُوا بِالسَّلاَمِ، وَإِلهُ الْمَحَبَّةِ وَالسَّلاَمِ سَيَكُونُ مَعَكُمْ ( 2 كو13 : 11 )