[لمسة يسوع]

فيه ست اسمها ثامار، اتجوزت "عير" ابن يهوذا ((أبن يعقوب)) لكن جوزها مات بدري وما خلفتش منه. وحسب عادات زمان، كان لازم أخوه يتجوزها عشان "يُقيم نسل" لأخوه اللي مات، فاتجوزت أخوه التاني ومات هو كمان.
هنا يهوذا حماها خاف، وقال في نفسه: "البنت دي شكلها بيجيب النحس، لو جوزتها ابني التالت شيلة هيموت هو كمان". فضحك عليها وقالها: "يا بنتي روحي اقعدي في بيت أبوكي ولما ابني الصغير يكبر هجوزهولك".
الصبر والانتظار
ثامار سمعت الكلام وقعدت سنين مستنية، وابن يهوذا كبر وبقى شحط، ويهوذا لسه مأجل الموضوع ومنفض لها تماماً. ثامار حست إن حقها بيضيع، وإنها هتفضل أرملة طول عمرها من غير سند ولا عيال.

الخطة الذكية الخاتم والعصايه

ثامار عرفت إن يهوذا حماها رايح يجز غنم في مكان قريب، فقررت تعمل "خطة سينمائية":
* قلعت لبس الأرامل الأسود.
* لبست برقع وغطت وشها تماماً عشان محدش يعرفها.
* قعدت في طريق يهوذا.
يهوذا شافها وافتكرها واحدة غريبة، فطلب يقعد معاها، فهي قالتله: "هتديني إيه مقابل ده؟". قالها: "هبعتلك جدي معزة من الغنم". قالتله: "ماشي، بس سيبلي رهن ضمان لحد ما الجدي يوصل".
* أخدت منه إيه؟ خاتمه، وعصابته الحزام بتاعه وعصايته. ودول وقتها كانوا زي "البطاقة الشخصية" أو "التوقيع" بتاع الشخص.

"هي أبرُّ مني"

بعد 3 شهور، الخبر وصل ليهوذا: "الحق يا يهوذا، ثامار كِنتك (مرات ابنك) حامل!". يهوذا اتجنن وقال: "دي زنت! طلعوها تتحرق!".
وهما مطلعينها عشان تتنفذ فيها العقوبة، ثامار بكل هدوء طلعت "الخاتم والعصاية" وبعتتهم ليهوذا مع رسالة قصيرة: "أنا حامل من صاحب الحاجات دي.. شوف كدة الخاتم ده بتاع مين؟".
يهوذا أول ما شافهم اتصدم وعرف إنها حاجته، وعرف إنه هو اللي ظلمها لما محماهاش ومجوزهاش ابنه. فاعترف بغلطه قدام الكل وقال: "هي أبرُّ مني" يعني هي عندها حق أكتر مني، وهي اللي صح

النهاية السعيدة

ثامار خلفت توأم فارص وزارح والجميل في القصة إن "فارص" ده طلع من نسله الملك داود، ومن بعده جه السيد المسيح.
الخلاصة: ثامار كانت ست ذكية جداً، ومستسلمتش للظلم، وقدرت تاخد حقها بدماغها وتدخل التاريخ من أوسع أبوابه
الكتاب المقدس 👌👍❤️🙏🏼