البيت وقع عليهم 😔..
سامى شاب ٢٨ سنه ابوه متوفى وعايش مع امه فى بيت قديم مكون من شقه وسطوح ، جه يسقف السطوح ويعملها شقه ويتجوز فيها لقى البيت كله مشرخ ومش هايستحمل ، والمهندس قاله لازم البيت يتهد وتطلع به من جديد ..
وهو مش معاه فلوس ، فا امه قالتله انا ليا ورث عند خالك روحله يديلك ورثك وابنى بيهم البيت ..
راح سامه لخاله اللى انكر اى حاجه وقاله جدك صرف كل فلوسه على مرضه قبل ما يتوفى وكل ده مجهودى وعرقى ..
ناس كبيره اتدخلت عشان يحلو الموضوع لكن للاسف مافيش فايده ..
لدرجه ان خاله قالهم" يعنى هو يتجوز وانا ماعرفش اجوز عيالى !! 😒
للاسف سامى ماكنش فى حيلته حاجه وخاطب له اكتر من خمس سنين وماينفعش يأجل تانى فا قرر انه يسقف السطح خشب ويتجوز لغايه ما ربنا يعدلها ..
يوم ١٠ يوليو ٢٠٠٨ للاسف الشديد البيت وقع وامه اتوفت .. 😔
يوم العزا جه خاله بيبكى وكأنه فاق من اللى عمله وحس بغلطه ..
حضن ابن اخته قوى وقاله" سامحنى انا السبب طمعى هو اللى ضيعكم 😔😔، ورث امك انا هادهولك وبزياده اضعاف كمان "
سامى رد عليه وقاله انا عم نفسى مسامحك لكن مش عارف ربنا هايسامحك ولا لا ، ورثى اللى انت جاى تدهونى دلوقتى ياترى هايرجع امى ؟؟ !!
انت كدا بتريح ضميرك يعنى !! بعد ايه ؟ ما خلاص راحت .. كان فين ضميرك قبل كدا ؟؟
دانا جتلك وقولتلك البيت هايقع ادينى حق امى وانت انكرت كان فين ضميرك ؟؟؟
روح الله يسامحك.. 🙏