[souad jaalouk]

زوادة اليوم :

المشكلة فينا مش بغيرنا

بيخبرو عن رجّال كان عايش مع مرتو حياة هنيّة.
بيوم من الإيّام اكتشف إنّو مرتو خفّ سمعها، قرّر يستشير طبيب العيلة قبل ما يعرضها ع طبيب أخصّائي، قلّو طبيب العيلة: «احكيها بشكل عادي وإذا ما سمعت قرّب منها شوي، وإذا ما سمعت قرّب أكتر حتّى لو اضطرّيت توصل لحدها، وإذا ما سمعت ساعتها لازم نعرضها ع أخصّائي». رجع الرجّال ع البيت وسأل مرتو: «حبيبتي شو عاملي غدا اليوم؟» ما جاوبت، قرّب أكتر وسألها مرّة تانية، كمان ما جاوبت، وهيك ضلّ يعيد حتّى صار وراها وسألها: «حبيبتي شو الغدا اليوم؟» ساعتها بيتفاجأ لـمّا بيسمعها عم بتقلّو: «يا عمّي صرت مجاوبتك أربع مرّات، الغدا دجاج وبطاطا».

الزوّادة بتقلّي وبتقلّك:

«مرّات كتيرة، منفكّر إنّو المشكلة بغيرنا، بس مع الأسف بتكون المشكلة منّا وفينا».
والله معكن.