علّمني يا رب إنّي ما أكونش متمسّك بخططي الخاصة
ولا أزمنتي اللي أنا حاططها في دماغي،
ولا بالأشخاص اللي أنا شايفهم مناسبين لي.
ساعدني يا رب أخلّي قلبي متسع إنه يثق في حكمتك أكتر من حساباتي،
وفي نظرتك البعيدة أكتر من عيني القريبة اللي مش شايفة غير الحاضر.
خلّيني أعيش زي طفل صغير ماسك إيد أبوه،
مش فارق معاه الطريق ماشي فين ولا هيوصل إمتى،
لأنه عارف إن أبوه هو اللي ماسكه.
علّمني يا رب أسيب ليك زمام حياتي وأقول بكل بساطة:
“مش أنا اللي أختار لنفسي، إنت اللي تختار لي”.
يمكن أحيانًا تختار لي طرق شكلها صعب
أو أوقات شكلها مش مناسب،
بس في الآخر أنا واثق إن كل اختيار منك معمول بحب وحنية
، وإنك بتجهّز لي اللي أنا محتاجه مش اللي أنا متخيله.
خليني أفرح وأنا متسلم ليك
وأعيش مرتاح إني مش لازم أفهم كل حاجة دلوقتي،
لأن اللي عارفك ويعرف قلبك يطمن إنك بتدبّر كل حاجة للخير.