انتو بتصدقو الناس اللى على السوشيال ميديا ؟؟
تبقى مصيبه لو صدقتوهم ، هم بيوروكو الجانب الحلو بس ..
بتشوفى صوره لواحده زميلتك على البحر وهى فى قمه سعادتها وشياكتها ، تقولى يابختها بتتفسح وانا اللى قاعده فى الهم ده على طول ، صدقينى انتى ماشوفتيش الجانب التانى من حياتها، انتى ماتعرفيش حالتها ايه مبسوطه ولا فرحانه ، دى ممكن تكون عامله جمعيه اصلا عشان تطلع الرحله دى ، انتى مش قليله الناس كلها شبهك ده يمكن حالك احسن من حالهم لكن هم بيصدرولك ان حالهم افضل ..
ماتصدقيش لو لاقيتى واحد كاتب لمراته كلام حلو على الفيس وتقولى انا جوزى مقصر معايا ، انتى ماتعرفيش الدواخل والخصوصيات ايه ، دانتى يمكن يكون جوزك مابيعرفش يقول كلمتين حلوين لكن افعاله بتدل انه حاطك فى عينيه ..
السوشيال ميديا اكتر مكان خداع بيبينلك انك انتى الوحيده اللى حظك وحش وبختك مايل وكل الناس مبسوطه وانتى لا ..
صدقينى غلط كل الناس تعبانين وعندهم مشاكل فى بيوتهم انتى لو روحتى محكمه الاسره هاتشوفى بلاوى هناك ...
ارضى بحالك وانتى مش اتعس واحده بالعكس انتى شبه كل الناس وبيتك شبه كل البيوت ، كل البيوت فيها مشاكل وكل البيوت فيها خناق وكل الرجاله مابيقولوش كلام حلو دايما لمراتاتهم ولا ليجيبو دايما هدايه زى مابنشوف على الفيس ..
انتى طبيعيه هم المصطنعين ..