في ناس كتير بطّلوا يدوروا على الراحة…
وبقوا بيدوّروا على الوجع.
مش علشان بيحبوا يوجعوا نفسهم
بس علشان تعوّدوا
إن الوجع هو أكتر حاجة مألوفة.
هو اللي عاشوا فيه كتير
وعرفوه أكتر من نفسهم.
في ناس بتتشد للناس الغلط
للمواقف اللي فيها أذى
للكلام اللي يوجع
وللنهاية اللي بتكسر.
مش لأنهم ما يعرفوش الصح…
لكن لأنهم متبرمجين
إن الكويس مش ليهم
وإن أي حاجة حلوة
وراها وجع أكبر.
المشكلة إنهم ربطوا وجودهم بالألم.
حاسين إنهم مش موجودين غير لما يبكوا
مش محبوبين غير لما يضحّوا بكل حاجة
مش مقبولين غير لما يتنازلوا عن نفسهم.
ربنا ما خلقكش علشان تعيش موجوع
ولا علشان تثبت وجودك من خلال الوجع.
ربنا خلقك علشان تعيش
وتتهنّى
وتتحب
وتتطبطب عليك
وتلاقي حضن ترتاح فيه مش تهرب منه.
الوجع مش هو اللي بيثبت إنك إنسان
الرحمة هي اللي بتقول إنك لسه عايش.
ولما تسمح لنفسك تستقبل حب من غير خوف
ده مش ضعف…
ده شفا.