[walaa farouk]

النهارده عيد الرسل، عيد رجالة مشوا مع المسيح لحد الآخر.
مش مجرد سمعوا وعظات… دول عاشوا معاه، أكلوا معاه، خافوا معاه، اتوجعوا معاه، وشافوا نور قيامته بيشق ظلمة العالم.

إيمان الرسل ماكانش إيمان سهل
. ماكانش إيمان نظري. دا كان إيمان جاي من علاقة
، من عشرة، من حب خلّى كل واحد فيهم يسيب دنيته ويمشي ورا صوت واحد بس: “اتبعني”

يعني إيه دا لينا النهارده؟
يعني إيمانك مش امتحان معلومات دينية
ولا مجرد حضور اجتماعات. إيمانك علاقة. قلبك رايح فين؟
رجلك ماشية ورا مين؟ مين اللي واخد أمانك، ومين اللي واخد وقتك؟

بطرس الرسول اللي أنكر المسيح ٣ مرات قدام جارية صغيرة…
هو نفسه اللي وقف بعدها قدام اليهود والولاة وقال:
“ينبغي أن يُطاع الله أكثر من الناس”
وفي الآخر اتصَلَب. وطلب يتصلب منكس الرأس،
لأنه مااعتبرش نفسه مستحق يموت زي سيده.

بولس الرسول؟ دا اللي كان بيطارد الكنيسة…
بعد ما المسيح لمس قلبه في الطريق لدمشق،
ماعرفش يقعد ساكت. لف بلاد، اتجلد، اتسجن،
اتغرق، وفي الآخر اّتقطِع رأسه لأنه رفض ينكر اسمه.

الشباب النهارده مش محتاج وعظات أكتر.
محتاج يشوف ناس حقيقية، زي الرسل،
عندها حاجة حقيقية تعيش وتموت علشانها.
محتاجين نرجع نسأل نفسنا: إيماننا بيغيّرنا فعلاً؟
ولا بنحضر ونجامل ونرجع نكمل حياتنا كأن ماحصلش حاجة؟

عيد الرسل مش ذكرى تاريخية. دا دعوة ليك وليّ النهارده:
تكون رسول في مكانك، في شغلك، في جامعتك، وسط أصحابك.
تكون شاهد، حتى لو تخسر شوية راحة، شوية قبول، شوية شعبية.
تبقى واحد الناس تشوف فيك ملامح المسيح اللي اتعرفوا عليه زمان من وشوش الرسل.